張敬軒（軒仔）昨天（22日）在社交平台放相，他去了城門水塘親親大自然，軒仔表示最近幾個星期，讓自己調整作息時間：「除咗有幾日做嘢做到晏少少，一般朝頭早大概六點鐘左右起身，大部分時間放低電話，將自己喺好長一段時間生活入面嘅感覺、經歷，好好咁樣整理，然之後將佢寫出嚟、唱出嚟。
呢個過程係一個自我療癒同自我修復嘅過程，尤其喺半年入面，要處理好唔止一個重要嘅人離開嘅情緒，我有畀時間去令自己慢慢take time，喺掛念同悲傷入面，將各種屬於情緒嘅零件好好整理，然後重新裝嵌。」
在文中軒仔特別提到Peter：「尋（前）日送咗Peter上機返倫敦，佢嚟咗香港兩個禮拜， 完成咗Avon一年一度嘅檢修，我幾乎日日都對住佢，學多咗嘢之餘，亦都搵返好多我哋當年由Avon 5樓嘅HCM Studio到廣州Village Studio每一個工程嘅美好回憶。
唔經唔覺接手咗Avon已經十年，入面嘅好多Vintage嘅機器，由於日常嘅使用，好多都有老化嘅問題，嚟緊嘅Avon需要有一段好長時間嘅維修同埋設備升級，亦都有一部分好重要嘅機器要退役，好彩有開放過畀大家入嚟聽下歌，感受下呢一批半世紀之前嘅機器。」
（即時娛樂）