英國搖滾樂隊Coldplay一連4場巡迴演唱會香港站，昨晚（8/4）於香港啟德體育園主場館舉行頭場，這亦是該場館舉行首場正式演唱會。Coldplay出場便一口氣唱出3首歌曲熱爆場館，而主音Chris Martin更用心學會幾句廣東話，同樂迷打招呼。至於香港女團COLLAR成員Marf（邱彥筒），一早已公告會擔任暖場嘉賓，但斷想不到去到中段，Marf更與Chris Martin驚喜合唱歌曲《We Pray》，其中Marf更唱出廣東版，令現場尖叫聲不絕，連Chris都聽到如痴如醉，煞停音樂要Marf唱多次，氣氛超高漲。
主音Chris全晚都表現興奮，不單跑足全場，期間更唱到又坐又瞓，盡百二分力量獻唱。而最有誠意是努力練了一句廣東話同大家打招呼︰「大家好，歡迎大家，我哋好開心嚟到香港。」令全場氣氛High爆。而Chris愛廣東話之情，隨後再展現一事。事源個唱中段時，Marf再度上台與Chris合唱歌曲《We Pray》，Marf更唱出廣東版，當Marf唱完自己部分，輪到Chris接上時，他突然叫停大會音樂，當大家以為發生甚麼問題時，原來他讚Marf唱得好聽，並捉緊對方隻手大讚Amazing！要求她再唱一次副歌，此舉令Marf受寵若驚，在第二次唱出時緊張到有一句甩嘴，但最終都順利完成，為香港歌手爭光。
除了大唱經典歌，Chris都好識搞氣氛，例如見到有個香港粉絲舉起的手幅有趣，便邀請她上台坐在旁邊聽他唱一首歌。而Coldplay個唱指定的放煙花環節，大會由於擔心嘈音問題要閉幕舉行，亦令煙花環節取消，但Chris就搞笑地叫大家發出poo poo聲，自製煙花聲效自High，逗得全場開懷大笑。而今日更是Chris囝囝的生日，於是他又即場跟囝囝Live，叫全場人跟他講生日快樂，場面溫馨。