現年57歲的鄭伊健於1986年入行，其國際歌迷會今年成立33周年，日前以「久別重逢」為主題舉行聚會，筵開25席，招待約300位來自香港、內地、台灣、日本、韓國和新加坡等各地fans。相隔8年再辦歌迷聚會，伊健直言很緊張，他化身導演兼司儀，親自安排表演項目。除了邀請合作無間的音樂監製陳光榮、歌手朱雋言和圈外好友Percy，組成期間限定band表演，還有陳光榮兒子Aiden演奏大提琴打頭陣。Fans就以這30幾年來，跟伊健經歷的片段剪輯成MV回禮。伊健看後非常感動，一度講不出話，強忍淚水。他說：「30幾年，有啲朋友喺度，有啲移咗民，有啲朋友⋯⋯大家身體健康！」。
台上表演由伊健安排，現場就由fans悉心布置，重現電影《久別重逢》場景劇照，讓fans代入女主角與偶像合照，還有歌迷會舊會的剪報。最特別是每位fans的座上，都擺放一盒伊健出道拍廣告的檸檬茶，而且更是當年的復刻版包裝。首先由Aiden 出場演奏大提琴，然後伊健出場，笑言要公開與Aiden的秘密關係：「你哋睇吓佢嘅髮型，長頭髮㗎，我將呢個秘密講出嚟，大家會唔會好驚？你哋係咪唔想接受？」伊健揭曉Aiden 是陳光榮的兒子，這是他第一次公開表演。
伊健問台下：「其實Fan Club成立咗幾耐？（30幾年）30幾年咩？多謝大家，原來我哋已經30幾年偶像與Fans嘅關係。」他邀請陳光榮出場，說：「大家記唔記得上次fan club party幾時？（2017年）當時我哋著咩衫表演？（校服）幾年前我哋仲可以著校服，依家就⋯…」他繼續邀請其他band友上台，並介紹他們身上貌似牛仔布的斗篷，是一位日本朋友用「和紙」為他們製作。然後伊健一連唱出《隨時候命》、《一起衝一起闖》和《自動勝利Let‘s Fight》等歌曲。演唱《Stronger》前，他說：「疫情期間好蕭條，要戴口罩出街，有好多嘢唔做得，嗰時我拍咗個廣告，首歌由陳光榮寫，我好鍾意份歌詞，鼓勵大家喺低潮時唔好咁易放棄！」之後與fans影合照和抽獎，送出簽名藍牙喇叭和海報。活動尾聲，fans意猶未盡大叫encore，全場大合唱《Together》。
伊健還在台上還宣布好消息：「以前香港唔太重視電影音樂，直至陳光榮出現，《仍能情深愛上》來自《姊妹情深》，仲有《風雲》、《中華英雄》、《極速傳說》，唔只我嘅電影，仲有《無間道》和《頭文字D》都係來自陳光榮。依家好多電子嘢，撳個掣就聽到，好少人會做隻碟留個回憶，佢就係做緊呢件事。今次仲會出黑膠碟，留住今年曾經有一樣嘢出現，感動到大家，記低佢，呢個就係我哋嘅回憶。」陳光榮說：「我好喜歡《久別重逢》呢套電影，而且伊健用咗另一個層次去演繹，令我更鍾意呢部戲，所以我決定出sound track（原聲唱片）。」。伊健更率先向fans劇透唱片封面和內頁靚相，他說：「依家做呢嘢唔簡單，尤其是黑膠碟。當日話出CD我都有反對，仲有冇人買咩？原來係『有』㗎！」陳光榮還透露黑膠碟正在德國印製，現已接受預購，CD下月推出。