現年60歲的張家輝近日四出為執導和主演的電影《贖夢》謝票，昨日（4月10日）有一段張家輝「教育」粉絲的片段在網上流傳，片中張家輝因遇到極端粉絲，語重心長地勸喻對方。影片相信是張家輝近日完成宣傳後拍攝，片中的他上車準備離開，被數名粉絲上前要求簽名和合照，片段一開始，就是家輝向粉絲訓話︰「有時做我可能真係簽唔到名，拍唔到照，你唔可以唔接受呢啲情況，即係我每次都要同你去做晒所有嘢先咩？你支持我我好多謝你，但你每次好極端咁，我一定要咁我一定要咁我……又唔可以一定，你咁大個仔，出嚟社會經歷好多嘢，都係需要有啲嘢唔係一定，係咪呀？」。
該名粉絲似乎一心想家輝聽自己的說話，插咀說道：「我有睇過你嗰套……」家輝立即搶著回應︰「我知呀，如果有些時候我真的簽不到，你唔好咁極端，知唔知道呀！知唔知？」該名粉絲繼續搶答，家輝手舞足蹈繼續說：「我唔想聽你嗰啲你睇過我咩嘢，我要你知道你自己咁大個仔，唔好咁樣，知唔知呀！人家話做唔到你啲嘢，你就發狂，唔可以咁樣㗎嘛！我哋喺社會做嘢，成日都會碰到一啲唔如意嘅事，唔可以一啲唔如意嘅嘢，我哋自己就呀！呀！呀！咁樣唔得㗎，係嘛？明唔明白呀？」。
該名粉絲表示明白之後，有另一粉絲又要求合照，張家輝不好意思地說︰「唔得，影唔到呀。」被訓話的粉絲遞上影碟要求簽名，家輝表示︰「你唔好嘈，我簽咗就係㗎喇，好冇，記住唔好咁樣，知唔知！」影片在網上流傳外，大批網民支持並大讚家輝用心教導粉絲。