電影《破·地獄》港澳票房破紀錄衝破1.6億，近日許冠文、衛詩雅及朱栢康更在「香港電影導演會年度大獎」先奪最佳男女主角以及最佳男配角獎，相信在香港電影金像獎有機會再下一城。而電影的加長版已鐵定於4月4日清明節上映，新劇照今亦曝光。
《破·地獄》加長版保留公映版的場面之外，還新增故事背景及枝節，當中飾演美玉的周家怡有更多場面於加長版曝光，家怡興奮透露：「好開心有加長版嘅面世，可以圓滿每一個角色，能夠睇到佢哋嘅故事，包括道生家庭故事都會喺加長版入面見到。我最開心係會保持有光明嘅結局，即係美玉嘅BB仍然會保留住，仍然係咁圓滿。」
至於公映版被剪掉的角色，亦會在加長版復活，電影公司發布谷德昭與岑珈其的劇照。跟子華及朱康同框演出的谷德昭表示：「能夠在《破·地獄》同大家見面，成為最高票房電影一份子，與有榮焉。」
而戲中飾演黃子華弟弟的岑珈其亦表示十分期待，又大爆自己是子華鐵粉，有機會合作大感夢幻：「我可以見到子華哥哥超級開心，因為我係好鍾意佢，佢係我偶像之一，仲要可以同佢同場，記得拍攝前一晚真係緊張到瞓唔著，所以真係好多謝導演俾呢個機會我。成件事都係好夢幻，子華哥哥係超級 Nice，拍攝前我哋一齊溝通傾偈呀，跟住一齊去試戲。所以成個過程係好開心好順利，希望加長版出到嚟大家觀眾都鍾意啦，多謝晒。」