由少年時期嘅駱澤信開始，一個人變出三條命。飾演主角少年時期嘅吳澤烽（ Tomi ），本身係做開廣告model，《三命》嘅監製之一朱淑儀（Elaine）喺廣告見到佢之後就搵佢去電影casting，最後冇被選中，但一年之後Elaine再聯絡佢，就得到咗《三命》嘅演出機會，成為少年駱澤信。
方以文IG︰www.instagram.com/fongemantvman
Tomi：「駱澤信係一個熱愛漫畫嘅𡃁仔，自尊心強，諗到就做，諗到就郁。」最無拘無束、無所顧忌嘅駱澤信，就係Tomi所演嘅少年時期，free到令觀眾如我好嚮往，直到佢喺公務員線遇到老豆（張錦程 飾）同另一個女人入餐廳，又見到阿媽（陳佩思 飾）坐喺餐廳另一邊默默地食嘢唔出聲嗰幕，駱澤信對住鏡頭食蛋治，終於學到有啲嘢幾難吞都要吞咗佢。
呢幕係Tomi最喜歡嘅一幕：「拍嗰陣個腦冇點諗嘢冇乜雜念，反而出嚟效果最自然。自己睇返都好投入到。演嗰時只係諗點解阿媽乜都唔做，覺得不解不忿。」我就睇到心噏。Tomi：「演緊嗰陣冇呢個感覺，好神奇。觀眾睇哂整體又會有另一種感覺。」
最難一幕都係喺公務員線，就係食完蛋治之後屋企食飯嗰幕，因為左撓嘅佢要用右手拎筷子夾餸，手都震埋。Tomi：「其實第一次拍劇就場場都好難……不過我覺得演得好唔好係主觀，唔同觀眾睇完意見都未必一樣。拍攝上學到好多好多，覺得自己好似intern咁，冇經驗，但做嘅嘢都係要畀人睇，所以好多謝咁多位前輩湊住。好評負評都用平常心去面對，希望自己嘅內在冇太大改變。有機會當然想繼續演戲。最緊要好好生活，搵到自己做緊嗰陣會發光的事。」
《三命》繼續講「銀河」永恆議題：宿命。少年時期作為駱澤信「一命開三命」嘅起點，Tomi信唔信咩都係整定？「我覺得我哋開局有嘅條件、一路以來可以做嘅選擇某程度上都係set好咗。但係做邊個決定、接唔接受，我信人有自由意志。我自己係一個好想衝但冇點去改變嘅人。今年犯太歲，希望勇敢接住啲起伏。」
如果真係有得揀，你希望駱澤信會生活喺邊一條命？Tomi：「如果可以，希望係阿龍仲在世嘅黑社會線。我好想延續漫畫《小英雄與小飛龍》咁，同阿龍繼續並肩作戰，一齊打天下。可以嚟個《龍與信的台灣著草編》。」阿龍冇咗，阿信繼續向前行。三條命，會唔會一個結局？