譚耀文從未放下歌唱熱誠　劉浩龍自揭「師兄」由來

無綫全新歌唱大賽《聲秀》下周日正式首播，製作組製作了名為《聲秀 序曲》的預熱式節目明天（20日）播出，屆時除了有得睇25位潛力新星的靚靚自我介紹短片外，還有七大導師蘇永康、譚耀文、劉浩龍、吳浩康、泳兒、鍾舒漫和胡鴻鈞的訪問。

1988年獲得《新秀歌唱大賽》金獎的譚耀文，雖然投身演員行列後未有唱歌多年，但他坦言從未放下對歌唱的熱愛：「因為我係好鍾意音樂，對唱歌仲係好有熱誠，希望不斷可以再進步。」他更笑言希望可以做到「傳承」：「我會希望加上我以往嘅舞台經驗同演戲經驗，可以幫助到學員歌曲傳達訊息嘅技巧。」泳兒亦坦言得獎後的道路並非一帆風順：「大家唔好以為我攞到咗名次就係順風順水，嗰個只係一個開始，點解？因為將來嘅路都會充滿住好多挑戰，但正正因為有好多呢啲難關，令到我好勇於挑戰自己。」至於 1997年《全球華人新秀歌唱大賽》金獎得主劉浩龍（師兄），則搞笑自揭「師兄」名字由來：「贏咗新秀之後，我喺TVB做咗幾年主持，甚至冇做娛樂圈嘅工作、出咗去賣錶，好辛苦好辛苦。終於2004年可以做番歌手，我第一隻派台歌就係《師兄》。」談到挑選學員準則，吳浩康近年為養家除了做地盤外，還已經當了9年歌唱老師，他聲稱自己「咩聲都Tune到」：「我覺得態度好緊要，肯唔肯學、肯唔肯練，因為唱歌唔係話你點一點我、我就明白同開咗竅。當然聲底好會有優勢，但我係無論咩聲都tune到，唱功我亦可以再教佢。」

東網網站 : https://on.cc/東網Facebook專頁 : https://www.facebook.com/onccnews/