盧覓雪質疑姜濤墮海智商言論　首回應遭外界誤解︰我嘅語氣係關心

盧覓雪昨日（18日）現身灣仔書展，為新作《台灣好味道》舉行簽書活動，獲唐詩詠、夢妮妲、其商台節目《在晴朗的一天出發》拍檔阮子健、German張志文，以及早前遭解僱的《晴朗》助理蔓兒到場支持。盧覓雪首度公開回應上月尾在節目中質疑姜濤「智商應該有啲問題」，她表示自己的言論遭外界誤解，又強調自己的語氣出於關心，但言者無心聽者有意。

盧覓雪被問到有關姜濤的言論，她解釋：「大家未聽清楚我講乜嘢，我係引用佢見記者時所講嘅嘢，記者問佢情緒有冇問題，佢話冇問題，解釋食藥飲酒跑步，當時4點幾，我只係笑，用幽默感話如果情緒冇問題，就係智商應該有問題。香港過咗夏至，日落時間大約7點幾，如睇日落未免太早，曬到暈都睇唔到，我嘅語氣係關心。言者無心聽者有意，如果要砌我都無法子解釋。」

盧覓雪直言，明白姜濤粉絲「姜糖」護主深切而不滿，姜濤回應得非常大方。「我呢啲前輩同長輩，點會唔關心年輕人。」她否認自己是姜糖，強調支持每位表現出自己的年輕藝人，與Edan呂爵安、Anson Lo盧瀚霆、AK江𤒹生及ERROR等曾經合作的年輕藝人更熟絡。「香港娛樂圈靠呢班年輕人接棒。我點會想呢班年輕人唔好。不過，有人想從中作梗，我都冇辦法。」

被問到有否致電姜濤或MIRROR經理人花姐黃慧君解釋，盧覓雪坦言沒有姜濤電話號碼。「我都想有，如果有，我直接打畀佢都冇問題，但花姐就免喇，透過中間人嘅話好複雜，當面講好啲。姜濤話有機會都想識我呢個前輩，如果有機會，我當然好願意識呢位後輩，大家就等呢個機會喇﹗」

事發當日，商台在節目重溫刪除她質疑姜濤智商的說話，盧覓雪表示之後她放了假，所以並不知道，相信是有人投訴，電台考慮到聽眾的感受後作出此決定。「既然咁樣，我覺得處理得好合理，冇問題，冇難受感覺，唔會認為商台處理不公。商台冇問過我，冇懲罰，亦冇解僱我。」她又澄清蔓兒被炒與事件無關，強調不要混為一談、無中生有。「既然大家入我數，我唯有私人請佢做助手啦。」