女神配對計劃︱葉蒨文被爆對Bad Boy情有獨鍾 羅毓儀鎖定林俊其

林盛斌主持無綫熱播戀愛綜藝真人騷《女神配對計劃》明晚播出第7集，正式進入Dating Camp對戰環節，5位女神葉蒨文、李芷晴、羅毓儀（Yuki）、關嘉敏（Carman）及梁敏巧（Maggie）會與13名求愛勇士／組員大玩扯大纜、中西餐配對，及心意配對遊戲。

Dating Camp的花生團由5位女神的閨密組成，分別是葉蒨文閨密莊子璇Hilary、李芷晴閨密何泳芍Honey、羅毓儀閨密王菲、關嘉敏閨密莊思明、梁敏巧閨密鄧伊婷，還有堪輿學家雲文子。閨密們更有權影響女神的同房過夜對象。閨密自然掌握對方勁多秘密，這集莊子璇、何泳芍及王菲先後化身「爆料熱線」輪流玩踢爆。莊子璇直指每次跟葉蒨文傾偈，都是圍繞戀愛話題，並自豪謂：「所以佢嘅情史我係知得非常之徹底，我知佢鍾意一啲望落好Bad boy嘅樣，同埋眼細係一定要！」莊子璇更在節目聲稱已睇穿葉蒨文哪一位求愛勇士。何泳芍則笑指只要李芷晴一有動作，便能馬上看穿對誰人有意思：「佢嘅情史我唔係淨係知道咁簡單，我係同佢一齊經歷，我會喺佢嘅行為度睇到佢鍾意邊個人。」

至於王菲自爆經常與羅毓儀撐枱腳時𥄫靚仔，並笑言羅毓儀有向她放風指對其中一位求愛勇者有感覺：「我都希望可以幫佢做吓助攻。」不過王菲最終卻會成為羅毓儀求愛最大障礙。其實羅毓儀情傾誰人答案絕對呼之欲出，在這一集，她繼續零掩飾她對林俊其的鍾愛，例如玩完第一個回合後要派發心動鎖匙（累積鎖匙最多者可與女神同房），她嬌俏地猶豫了一輪後開心表示要畀林俊其，由於林俊其在環節中表現零突出，連自己接鎖匙也受寵若驚，全程睇實比賽進程的主持林盛斌見狀忍不住問：「點解嘅？佢淨係出戰過一次咋喎！」而李芷晴則毫不客氣大叫：「偏心。」被連環「篤爆」的羅毓儀只能弱弱回應咗N咁多次「因為…」事後她接受製作組訪問時坦白承認對林俊其的鍾愛：「有機會要揀（Key）嘅時候，一定要畀自己最想畀嗰個人。」

今集女神會以3個不同造型亮相，當中包括水著Look！本次的花生團一來便直指「水著女神」的企位能顯示她的心動對象。

（即時娛樂）