羅子溢球場展雄風　洪永城：你識踢波嘅咩？

藝人羅子溢暫時未有新工作安排，這段日子便「攞正牌」陪一雙兒女放暑假。近日他又於社交平台照出「波牛照」，綠茵草地上踢足球搞到汗流浹背，且圖文並茂寫道﹕「Me time，耐冇踢波，踢完散晒﹗」隨即引起熱議，瞬間獲逾萬人點讚，就連洪永城亦留言問道：「你識踢波嘅咩？」

子溢昨午受訪「解畫」，原來他除了泳術了得外，也十分「好波」，子溢笑說：「求學時我係校隊成員嚟㗎，成績仲要唔錯，入行後我都仲有約波友得閒踢波，但3年前我十字靭帶受傷斷裂，搞到要做手術，事後可能因為有陰影，加上要對自己嘅工作負責，唔可以隨便再受傷嘛，所以就掛靴掛咗一段日子。近排見有啲時間又想練番，天氣雖然好熱，但呢個運動對修身好有幫助，咪當操弗吓自己囉。」

球場上除了踢波，子溢亦很享受「男人的浪漫」：「踢完同班朋友一齊坐喺球場邊吹水，傾吓偈、講吓心底話，好開心㗎。」他又打趣希望日後兒子長大，樂於父子檔上陣鬥波﹕「如果我唔保持狀態，到時佢跑得好快，我跑唔郁又點算喎？哈哈！」

東網網站 : https://on.cc/東網Facebook專頁 : https://www.facebook.com/onccnews/