被麥美恩當眾拒邀做朋友　方皓玟：邀請明顯係講笑

方皓玟早前拍片回應網民討論話題，當中提到麥美恩於Threads曾出Post，寫道：「風都吹得起 食多啲嘢啦 唔該」，質疑對方影射自己。麥美恩不久後在社交平台澄清，指自己澄清不是指方皓玟︰「唔係啊，唔係啊，唔係你啊，我已經5G衝浪回覆Cam Man哥哥，多謝你幫我解釋返」，方皓玟亦有主動留言：「做個friend可以？」。麥美恩日前出席公開活動，接受傳媒訪問時表示自己怕醜，又被嚇親，直認拒絕跟方皓玟做朋友。

方皓玟昨日（3月17日）在社交平台出帖回應事件，表示基於禮貌所以邀請對方做朋友，「我睇到依家仲驚過你呀，邀請你做朋友好明顯係講笑㗎咋，傻豬唔好咁認真啦！」之後再出帖分享唱搖藍曲的短片，寫道：「唔駛怕，唔駛驚，希望我溫柔嘅搖藍曲可以幫大家定定驚啦」。

方皓玟在帖文中寫道：「有記者朋友send咗麥美恩嘅訪問俾我，Mayanne其實你真係唔駛驚喎，我睇到依家仲驚過你呀，邀請你做朋友好明顯係講笑㗎咋，傻豬唔好咁認真啦，只係當日Cam man哥哥遞咗你個threads post俾我，我即時貪玩留咗個言，事後基於禮貌所以邀請你做朋友，唔駛驚唔駛驚，我唔怕食檸檬㗎，做人唔使太認真嘅。做朋友都要講緣份嘅。」