胡楓揭「長壽癦」惹謝賢羨慕　被監生掹長壽毛珍藏

阮兆祥、梅小惠及江欣燕早前合作拍攝節目《友乜唔講得》，明晚（23日）播出的第七集嘉賓是胡楓（修哥），出名是「開心果」及「好好先生」的他被爆私下其實相當佻皮、幽默，更被指相當在意面上的「長壽癦」，完全「唔畀掂」。

江欣燕在節目上透露入行首部電影即與修哥合作，並謂因而發現修哥原來有櫈都唔願坐：「套戲我同君如係演舞女，咁ending好多困獸鬥嘅戲，我同君如都好眼瞓，一見到櫈就坐，但修哥唔坐架喎，不停喺度行行行。到我諗住畀番張櫈佢坐，修哥就話：『我唔坐嘅，你哋後生坐啦』。」修哥事後笑言其實自21歲開始已有「行路養生」習慣：「我1953、54年開始行，行到依家喇，求其有地方就行。」祥仔聞言即大搞爛gag：「咁咪讀萬卷書不如行萬里路？」修哥即發揮幽默本色回應：「啱喇，我冇乜學問吖嘛！」

江欣燕又爆出修哥十分著急面上的「長壽癦」，不過修哥聞言卻搞笑摸面澄清謂：「我希望啲靚女掂我，但阮兆祥嗰啲就唔好掂喇！」他續指長壽癦上的長壽毛十分吉利，更笑言謝賢十分羨慕他有長壽癦，更曾經按捺不住監生掹了一條私人珍藏：「有次四個小生去旅行，大家喺度講緊嘢，佢就喺度摸摸摸然後掹咗一條，仲要珍而重之咁收埋。」修哥席間還大談拍攝《四個小生去旅行》的趣事，並直認曾於謝賢及曾江嗌交！

修哥21歲入行已馬上坐正做男主角，在阮兆祥引導下，大爆昔日其中一位好拍檔吳君麗的怪習慣。阮兆祥在節目指見吳君麗與修哥擁抱時「起晒槓」，一向反應快的修哥即時回應：「唔單止咁，仲批踭添！」說畢更搞笑地還原昔日遭吳君麗推開的畫面，修哥又笑指當時被推後的回應是：「麗姐，我要睇跌打喇！」