陳瀅獲粉絲深圳搞生日會　承諾努力工作報答大家

藝人陳瀅（Jeannie）早前到歐洲旅行，順道慶祝生日，一向寵粉的她在投入拍攝無綫新劇《璀璨之城》前，特地到深圳舉行盛大生日會，看到一班粉絲為她準備及所做的一切時深受感動，承諾努力工作報答支持者。

Jeannie自返港就密鑼緊鼓籌備生日會，有感過往每次在香港出席活動或舉行生日會，內地粉絲都要長途跋涉來香港，所以她特別移師到深圳開生日會，對粉絲說:「今次終於係我嚟搵你哋，唔係你哋嚟搵我啦!」

粉絲亦相當有心思，將會場布置美輪美奐，設Jeannie肖像打卡位，又扮壽星公出場為她賀壽，更送上別出心裁的禮物，就是一部攝影機擺設，圍住攝影機之菲林，就是她所拍過的劇集劇照，寄望偶像可以拍更多好劇，及預祝她《璀璨之城》拍攝順利，令Jeannie驚喜又窩心，一班粉絲還準備了才藝表演，如唱歌、跳舞及打鼓，坐在台下的Jeannie睇到拍爛手掌。

Jeannie說：「可以同Fans開生日會係件好開心事，第一次喺生日Party係有才藝表演環節，通常都係藝人做才藝表演，今次係佢哋表演番畀我睇，真係好開心，忍唔住想同佢哋一齊表演。」

提到生日願望，她希望大家身體健康、開開心心，而今年收到最難忘生日禮物就是手錶，Jeannie說：「生日時喺歐洲旅行，啱啱朋友買咗兩隻同款手錶，話想同我一齊戴，覺得真係Sweet。」至於歐洲生日之旅共去了兩周，跟幾個好朋友一齊去玩，好朋友每晚都為她安排不同形式晚飯，令她玩得好盡興，回港後，她就收拾心情到澳門拍攝《璀璨之城》，Jeannie自言好期待:「因為好耐冇拍劇，真係好開心，我會畀心機工作。」

東網網站 : https://on.cc/東網Facebook專頁 : https://www.facebook.com/onccnews/