紐約馬拉松紀錄片《Final Finishers》| 就算包尾，都係贏!
你有冇諗過，喺一場幾萬人參加嘅馬拉松裡面，最後嗰個係點樣完成賽事？唔係冠軍，唔係明星選手，唔係電視機前直播嘅主角，係真 • 最後嗰個。觀眾已經走晒，終點線幾乎收檔，finish line 得返啲工作人員拉住膠帶等緊你，攤位收起、補給冇晒、連獎牌都要人幫你喺箱底搵返出嚟果隻。
就係呢一班人，先至係《Final Finishers》呢部紀錄片嘅主角。《Final Finishers》係一部關於紐約馬拉松最後一群跑者嘅紀錄片，佢唔係講誰誰誰跑最快，而係講述嗰啲最擔心「能不能完賽」嘅人，可能係你、我、或者我哋。
慢，唔等於冇價值。
馬拉松比賽，好多時都係速度崇拜嘅祭典。網上無數片段，影住精英跑手嘅步頻點快、擺手點準、鞋底點彈。好似話你跑唔到 sub-3，唔該你唔好意思話自己係跑手咁。
但係《Final Finishers》就偏唔係咁玩。佢拍住紐約馬拉松最後幾位跑手，有退休人士、有新手媽媽、有初跑者，有啲甚至係用行都未夠快嘅速度去行。咁都拍？拍。因為就係佢哋，先至代表咗大部分人心入面最真誠、最赤裸嗰份「我真係好驚完唔到」嘅跑步焦慮。
紀錄片製作團隊 圖片來源
其中一位女士喺訪問中話:「我唔係跑手，我係一個嘗試唔好放棄嘅人。」
喂，聽到呢句真係心頭一震，兼發人深省。
我哋跑，係為咗唔放棄。
片入面有個男人，太太過身後，一度頹到連出街都冇心機。朋友鼓勵佢報馬拉松，佢話:「我報都報咗，死就死啦。」結果，佢用咗成八個鐘，邊跑邊喊，一邊講返老婆當年點支持佢走出抑鬱。衝線一刻，佢望住個終點話:「 我仲企得起，我仲有心跳。」
你話，咁樣跑完一場馬拉松，有無意義?
無破PB又點? 佢破咗人生一個最大嘅死結。
包尾，但唔係輸!
《Final Finishers》入面有位來自皇后區嘅60 歲阿姐，全程用快步行咁走，講到尾氣都唔夠，仍然笑住話:「你話我慢？我起碼比坐係梳化快。」，又有另一個叔叔講:「人生冇咩一定要跑得快，但最緊要唔好停。」
睇住佢哋一個個喺天黑入夜後衝線，你真係會喺心入面起雞皮，嗰種感動，唔係「哇！佢跑得勁快」嗰種；係「我從未見過一個人，咁堅持去完成一件其實佢好難完成嘅事。」
而事實係：冇人可以偷走你完成咗一件事嘅事實。
你就算係最後一名，你都係一個「完賽者」，Finisher。
起碼比起無開始嘅人，個囉柚仲坐喺梳化撳電視遙控嘅人，你行得遠得多，更有資格同自己講，I am proud of myself!
你唔需要係跑手，先至可以跑。
紐約路跑協會 CEO 喺片中有句說話非常中肯:「睇人跑兩個鐘完馬拉松唔會令你覺得你都做得到；但睇住一個人用七個鐘一步一步行完，會令你好想去試一次，你以為遙不可及嘅事情。」
馬拉松唔係一場比賽，佢更似一面鏡。你跑得有幾快、堅持咗幾耐、幾時想放棄、幾時扭轉心態，全部反映緊你人生入面一啲狀態同態度。
你可能係一個新手，未做過運動；你可能喺人生低谷，覺得冇力再走落去；你可能正面對工作、家庭、病痛一啲唔知點解決嘅困難。
但記住，就算你係包尾，你都仲喺度行緊。仲喺度，就未輸。
所以，唔好笑包尾果個。
因為好多人根本未起步。
起步已經係勇氣。堅持到底，就係勝利。
你冇必要跑贏人哋，只要跑得過自己就得。因為去到最後，唔係邊個最快，而係邊個唔肯放棄。
後記： 如果你人生有一場「馬拉松」未開始，記住，唔需要等到準備好先出發。你一踏出第一步，就已經贏咗昨日唔敢郁嘅自己。包尾都唔緊要，完成咗，先至叫有心跳嘅人生。
[View this post on Instagram
](https://www.instagram.com/reel/DK0iKLkJEqy/?utm_source=ig_embed&utm_campaign=loading)
The post 紐約馬拉松紀錄片《Final Finishers》| 就算包尾，都係贏! appeared first on Fitz 運動平台.