梁嘉莹自揭做過肥妹仔體重達154磅　為參加港姐地獄式減肥

應屆港姐亞軍兼「最上鏡小姐」梁嘉莹（Emily）身形高挑，加上擁有一身古銅色肌膚及陽光笑容，參選時已被封為「翻版鍾麗淇」。不過原來梁嘉莹曾經歷「肥妹」階段，她曾上載短片自爆當年重達140斤（約154磅）：「呢個就係曾經嘅我喇，係個小肥妹。之前覺得美食係第一，但係把健康同外形擺喺最後，每日睜開眼就喺度諗緊去食咩，瞓覺前都會諗各種美食。雖然都會健身，但係從來都冇控制過個嘴，就好似練1次就要用3餐彌補番畀自己。」結果令她體重最高峰達到140斤（約154磅）！

不過為了大學畢業典禮及參選港姐，她終下定決心努力減磅：「我為咗呢兩個人生重大嘅時刻，嚟塑雕我嘅身材！」除了勤力做運動同注意飲食之外，她每天都會浸腳去濕氣加速新陳代謝，亦有服用一些補充劑，最後成功收身，減到110斤（約121磅）！

東網網站 : https://on.cc/東網Facebook專頁 : https://www.facebook.com/onccnews/