Ian、AK見面祭揭夾租笑料　 堅拒同居旅行都要各自租車

人氣男團MIRROR 12子分成四組舉行粉絲見面會，《HI MIRO！見面祭2025》第四回於今（27日）、明兩日合共舉行三場，中秋佳節將至，今回陳卓賢（Ian）和江𤒹生（AK）除了與鏡粉近距離接觸，更特別安排點燈環節，與粉絲提早過節人月兩團圓，有網民分享每位到場粉絲會獲得文旦柚子，不過有留言搞笑表示：「跑幾場嘅點算？」

Ian與AK由參加《全民造星》期間已建立深厚友誼，今次獲安排出席同一場見面會，兄弟情亦成為焦點。而在問答環節期間，當被主持人問到是否願意一齊住，二人即時耍手兼擰頭，AK直言已經過了想和朋友一齊住的階段，Ian則解釋自己喜歡室內設計，對屋企環境有要求，AK即時回憶起過去二人曾合租工作室，當時添置的新傢俬送到，Ian表示清楚AK個性所以特別提醒對方，未料AK轉個頭就因為用𠝹刀拆貨𠝹爛梳化，AK即時圓場表示：「有時有啲傷痕係好事。」Ian之後又大爆有次在工作室完成編曲，因為AK手多令檔案遺失，不過Ian提起往事依然笑笑口，相當好脾氣。至於會不會一起去旅行，Ian與AK則透露如有機會一直有興趣結伴自駕遊，但就澄清想分房瞓及一人一車，可能只有食飯時會見面，引發台下粉絲爆笑。