隨住皇馬同利物浦聯賽輸波，今季歐洲五大聯賽各項賽事保持全勝只係得返拜仁

💥隨住皇家馬德里作客2:5輸俾馬德里體育會同埋利物浦作客1:2俾水晶宮絕殺，今季歐洲五大聯賽各項賽事保持全勝只係得返拜仁，拜仁就係前晚主埸4:0擊敗雲達不萊梅，各項賽事8連勝。不過拜仁嚟緊想保持全勝絕對唔簡單，嚟緊係歐聯要作客塞浦路斯🇨🇾球隊帕福斯，返到德甲作客對法蘭克福，之後仲係主埸對多蒙特上演德國國家打吡😶

🚨拜仁前鋒哈利簡尼最近同拜仁球迷派定心丸「我唔考慮返去英格蘭踢波，因為我係拜仁好開心，我同球隊仲有兩年合約。我享受呢一刻，重返英格蘭唔係我考慮範圍。我幾享受同球隊、同埋教練一齊嘅時間，希望我哋繼續可以取得成功🙂。」

💬簡尼之後被問到幫拜仁入咗100球，呢位英格蘭🏴󠁧󠁢󠁥󠁮󠁧󠁿前鋒就話「對我嚟講真係好癡線，為拜仁呢間偉大球會入到100球係一種榮譽，當然要多謝隊友同教練團隊幫助，能夠係短時間內完成呢個里程碑真係好美妙，我希望嚟緊再幫拜仁入多100球😎。」