華納串流平台「 Max 」11月19日登陸香港　HBO Go 用戶自動轉新平台　《Friends》、《哈利波特》都有得睇

華納兄弟探索集團（Warner Bros. Discovery）宣佈旗下串流服務 Max （之前叫 HBO Max ）將會喺 11 月 19 日正式登陸包括 香港 等7個東亞地區 (仲有 印尼、馬來西亞、菲律賓、新加坡、泰國、台灣)。而現時嘅 HBO Go 用戶就可以喺 Max 上線當日自動升級到新平台，繼續睇片。

觀眾可透過 Max.com 官方網站或指定合作夥伴訂閱 Max。平台暫時提供兩種月費方案，標準方案可以 全高清影片解析度 ，同時喺 2 部裝置上睇片，並支援跨裝置觀看及下載最多 30 套影片。而高級方案就可同時喺 4 部裝置上觀看，最高支援 4K Dolby Vision 和 Dolby Atmos，並可下載最多 100 套影片。

不過官方暫時就未公佈價格，但以美國市場嘅稅前月費作參考，有廣告嘅月費係 9.99美元 (約78港元)，無廣告嘅月費就係 16.99美元 (約132港元)，終極無廣告方案月費就係 20.99美元(約163港元)，所以港版 Max 估計最低月費可能都係大概 78 港元，同其他串流影片平台差不多。

Max （HBO） 劇集、電影同紀錄片嘅內容都超級豐富，有睇開嘅觀眾可能都知道經典劇集《Friends》會喺10月31日喺 Netflix 下架，並回歸到「 Max」另外，Max會提供 HBO 多套獨家原創劇集，包括《沙丘: 預言》、《權力遊戲》前傳《A Knight of the Seven Kingdoms》、恐怖經典《IT: Welcome to Derry》、 仲有《龍族前傳》、《白蓮花大飯店》同《最後生還者》的最新一季也將同步上架。而熱門電影就有《哈利波特》、《沙丘瀚戰: 第二章》、《Barbie》、《水行俠與失落王國》、《哥斯拉 x 金剛: 新帝國》等等，內容都真係幾吸引。

官方就話 Max 嘅訂閱費用會喺未來幾星期公佈，考慮訂閱嘅影迷密切留意啦！

▼Follow GadgetGang HK
YouTube: https://www.youtube.com/@GadgetGangHK
Instagram: https://www.instagram.com/gadgetganghk/