宏福苑五級火｜前消防員憶殉職同袍何偉豪　細說火場前線壓重、無助感強

曾駐守新界南、任職消防員七年多的前消防員 Frankie，一年多前移居加拿大。他接受《集誌社》訪問時憶述，宏福苑發生五級火當日，加拿大正值凌晨四時許，他從前同事的訊息得悉宏福苑火勢猛烈，有同袍殉職，令他震驚不已。殉職消防員何偉豪是他的前同事，服役九年。Frankie 形容，何偉豪平日熱愛運動，「係好搞笑嘅人」。對於何偉豪殉職，他感慨，「我哋做消防呢一行，唔係用命用換命，係用專業去到救人」，「以一命換一命，就好似無咗個意義」。

Frankie 憶述，翌日醒來上班後，他仍不時留意火災最新消息。他形容，這次火災是最嚴重的一次。「我知道我啲前同事入到火場，佢哋一定好辛苦。入面嗰環境，我相信甚至乎係佢哋做消防咁多年嚟，第一次見到咁worse（惡劣）、咁恐怖嘅環境，因為入面係漆黑一片，即使你有同伴，你都好迷茫，因為你伸手不見五指，大家一米距離都望唔到。」

火場環境惡劣，消防員救火的困難重重。（資料圖片）

對於救火困難，他表示，消防隊伍需用上熱能顯像探測器偵測位置，但一隊人往往只有一部，加上消防員身上背負各種裝備，行動困難。「你知道入面係好多人，但你救唔到，嗰種無力感，我相信係佢哋……嗰一刻我都好想參與當中一部分。」但他已離開消防工作，一度哽咽只好心中祈願「你哋唔好有更加多嘅人出事」。

他坦言，火場情況瞬息萬變，加上所背負裝備及防護衣等有一定重量，實際救援時間只有約 20 分鐘，而前線同事亦面對沉重心理壓力，「佢哋每行一步，佢哋就 feel 到有啲屍體，甚至乎係人喺度，我會身同感受到嗰種無助感」。他感慨，自己當初若然沒有離開消防處，「我自己都好想繼續做返呢份工作，因為我覺得呢份工作好有意義」。

對於有人批評消防員「唔識救火」，質疑為何不用直升機或水彈，他認為，如果用直升機救火，只會增加氣流，令現場火勢加劇。至於為何不尋求內地消防員支援、用上內地一百米雲梯，他認為宏福苑所在地，空間有限，加上現場已停滿消防車，難以再部署大型雲梯。

Frankie 認為，這次火災不只有消防員付出，市民亦付出很多。他聽聞有一名判頭因不斷疏散人群，最終在火場中喪命。然而，Frankie 最想跟前消防同袍說，「繼續加油」，把無力感轉化為深刻記憶，「遇到呢個情況就係，大家唔好放棄，希望大家可以拯救更多生命，繼續保持住消防處理念，竭盡所能去拯救生命，保障市民財產」。

問及棚網火災是否較難撲滅，他表示，消防員一般六分鐘內可到場，成功撲救機會視乎當時環境而定，「因為棚網嘅燃燒速度可以好快，可能短短幾時鐘，甚至兩三分鐘成個燒晒。當然喺咁密集嘅地方，（火勢）蔓延得好快，去到宏福苑嘅 Case 未必咁快救得熄。」他分析，尖沙咀早前同類火警因棚網面積較小，因此較快受控；但宏福苑多座大廈均設棚網，加上當時風勢強勁，火焰容易被吹散至周邊，令撲救難度倍增。

歡迎追蹤以下平台，即時接收《集誌社》最新資訊，及付費訂閱支持！
【付費訂閱《集誌社》】
https://thecollectivehk.com/subscribe/
【訂閱《集誌社》Youtube】
https://www.youtube.com/@thecollectivehk
【Like 《集誌社》IG】
https://www.instagram.com/the_collectivehk/