小心「邪惡雙胞胎」！ 澳洲男子僞造機場公共Wi-Fi竊取乘客資訊

真係幾時都話免費嘅嘢係最貴！近日，有一個澳洲男子涉嫌喺珀斯、墨爾本同阿德萊德嘅機場利用同機場免費Wi-Fi同名嘅熱點去誘導乘客連接，再用「Evil Twin」攻擊形式盗取連接咗Wi-Fi嘅乘客嘅個人資料。呢件事發生咗之後，即刻引起好多人對網絡安全嘅關注！

「Evil Twin」係一種利用假 Wi-Fi 接入點的黑客攻擊形式。多數利用「Evil Twin」嘅黑客會搵啲會提供免費Wi-Fi嘅地方例如Cafe、機場等等，然後將同名嘅假網絡免費提供公眾使用。好多公共Wi-Fi喺連接之前都會彈一個網出嚟要使用者同意條款，呢個「Evil Twin」嘅Wi-Fi亦唔例外，佢哋同樣會彈一個網出嚟，仲需要使用者提交個人資料，當黑客拎到資料後就可以對佢哋嘅電子裝置進行控制，盗取佢哋更多個人資料。

好彩最後有一位機場員工發現到呢個可疑Wi-Fi，澳洲警方就介入調查，佢哋喺呢名42歲嘅澳洲男子屋企發現犯罪時使用嘅Wi-Fi裝置、電腦同電話，並將佢拒捕。澳洲嘅警察就提醒市民正規嘅Wi-Fi喺唔需要輪入個人資料，其實香港都一樣啊！大家見到呢啲可疑嘅網絡千祈唔好為咗貪佢免費而用啊，如果唔係可能就要為咗呢啲一時嘅著數付上代價，得不償失啊！

▼Follow GadgetGang HK
YouTube: https://www.youtube.com/@GadgetGangHK
Instagram: https://www.instagram.com/gadgetganghk/