《頭文字D》 4K重映登港產片票房冠軍　劉偉強突襲金句場：三萬蚊過夜

《頭文字D》今年踏入20周年，上映4K修復+杜比全景聲版，重映即登上港產片票房第一位！作為港產神片之一，片中三秒一句經典對白，戲迷津津樂道，寰亞電影更推出「鬥爆金句場」，觀眾一齊狂拋對白，全場男觀眾齊講「我買咗件好性感嘅泳衣」，非常震撼，以致門票開賣即爆滿，反應熱烈不停加場。

劉偉強導演前晚突襲其中兩場「金句場」，因為全院滿座，他只好偷偷坐在樓梯位，感受觀眾鬥講金句的威力。他在放映後驚喜現身，觀眾爭相拋出心水金句「三萬蚊過夜」，亦有人邊講「我唔會輸俾同一個人Twice」邊做招牌動作，非常熱鬧。劉偉強說：「好開心，我知道有呢場『金句場』，今日特登返嚟。我嘅金句係『我要GTR』，當年拍呢套戲，我個仔10歲左右，佢睇完戲就不停話『我要GTR』。嗰啲『三萬蚊過夜』係你哋大人嘅金句！」

不少觀眾表示第一次入戲院睇《頭文字D》，有人即場要求劉導推出4DX版，他一秒答應，引來全場歡呼。「明年呀，考慮緊整《頭文字D》館，有你哋講嘅感受。」身為電影攝影師之一，劉偉強自豪地說：「好多鏡頭都由我揸機拍，由車碌pan入車廂、好準確咁pan到AE86衝出嚟，其實好難。我諗後繼無人，因為真係太危險，所以我要親自揸機。有啲鏡頭，架車近到就喺我塊面旁邊擦過。呢個都係我唔再拍嘅最大理由，因為真係會死㗎！」

看見觀眾熱情反應，劉偉強坦言20年前他搵命搏都是值得。「今日見到你哋嘅反應，同埋睇返啲畫面，感覺唔係20年前一嘅戲，好似啱啱新拍出嚟嘅電影，依然好trendy，所有演員都做得好好，都係Lucky！」他笑言：「估唔到20年後仲可以重映，20年後我仲企喺度，仲未死，真係好開心，多謝大家！」散場後，觀眾排長龍請他在戲票和海報上簽名和合照，突然變成簽名會。有觀眾以金句「twice」表示會睇多兩次，劉偉強笑說：「睇兩次點夠喉？睇多十次八次啦！」