倫敦馬拉松｜Kate︰馬拉松都能突破 還有什麼事過不去？

陀住細佬知道自己要跑倫敦馬拉松（London Marathon），陀住7個幾月都要去jog下，生完3個月跑6公里都好索氣。

文︰Weak Ends Here跑手Kate

WEH神隊友

2024年底10公里慢慢跑番入60分鐘內，然而全馬課表試過跑25公里跑到抽筋，返到屋企樓下都上唔到樓。試過被曹星如夾住天未光跑28公里，亦試過放工跑32公里，跑到馬場熄燈，仲有無數個星期六有好多Weak Ends Here隊友陪太子女讀書，跑到34K都有隊友陪住。

這個倫馬準備過程真係好多回憶，當你有一個願望，全村人都會想盡辦法幫你。

賽前10公里PB

用了一生運氣抽中倫敦馬拉松，以為自己已經好好準備，出發前10公里刷新個人最佳時間，PB跑進50分鐘內。計劃卻趕不上天氣變化，之前兩隻全馬我都係打雨戰，人生首個好天氣下開跑的馬拉松，先發現跑烈陽馬拉松原來要無比強大意志。

捱到家人打氣

頭15公里都在掌握之內，但越來越熱，半馬之後開始跌速。開始不停傻婆搵仔，人群裡面好想見到家人和朋友達夫一家，終於捱到30公里，俾我見到他們。我曬到真係好想好想放棄，但見到他們曬住周圍搵我，唯有頂住。

之後12公里全程死撐，唔敢再停，聽到所有觀眾望住我心口大叫「Keep Going KATE! You are wonderful KATE!!Go KATE!!! Proud of you KATE!!!!」，仲有幾句香港人加油，我都盡量俾「OK手勢」與微笑回應。我只係一名馬拉松跑手，跑完係應份，點配有成個倫敦街頭每隔10秒大叫Kate加油喎？

先嘔吐後衝線

倫敦人太熱情，我將本來高標逐漸調整，平PB都收貨，但意外係最後1公里發生，最想加速時候又作嘔，好彩成功喺地標Big Ben前嘔到七彩再出發。嘔完返終點先發現仲有幾十秒就夠4個鐘，最後以4:00:05衝線。

呢5秒真係好難忘️，如果我唔停留同家人相擁可能追得番幾秒？唔能夠PB難免失望，但人生中重要賽事可以同家人一齊經歷，此刻無價。

如果馬拉松沒有盡頭

這4小時零5秒耐過我由作動到生出BB。認真，跑馬拉松同生仔一樣痛苦，但BB兩個就夠，馬拉松就跑極都唔夠……雖說這隻馬好熱，但又忍唔住入紙抽下年倫馬，1/1,100,000 機會，直覺話比我知我好快又會中，倫敦馬好快又見。

最後，馬拉松都能突破了，還有什麼事過不去的？

▼ Follow Weak Ends Here
Instagram: https://www.instagram.com/weak.ends.here/
Facebook: https://www.facebook.com/weak.ends.here/
Website: https://www.weakendshere.hk/