【觀後感】《王雙駿 HATS ON 音樂會》While the Music Lasts

王雙駿喺上星期舉辦僅此一場既作品展，雲集眾多歌手，帶嚟高質音樂之夜。

「群星一起再 發光 破開天曉 虛空幻變 的愛 完美閃耀」

音樂會由兩位Mirror成員打頭陣。Jer唱出重生三部曲，由瘋狂到虐心再到鼓勵人心，即使聽過好幾次，但同樣震撼動人； Jeremy演繹《半》同《You First》一如所料地驚艷， cover《桃色冒險》仲充分展示佢既妖味，為依首舊作賦上新味道，非常吸引。

兩位精彩既演出彷彿象徵香港樂壇新世代已經展開。

「年輕得碰著誰亦能像威化般乾脆 快活到 半日也像活盡一百萬歲」

演唱會第二章就帶大家走一趟回憶之旅。

先由Juno魔性笑聲開始，佢今次表演比先前幾次簡單，但更展現到佢獨特既風格。而霆鋒一出場已經型到爆，舞台魅力十足，聽到《活著Viva》頭幾個音全場馬上熱血沸騰，每一句歌詞都承載大家既青春回憶。緊接仲有軟硬驚喜現身，將氣氛推到最熱烈。

「偶遇他鄉 時候 各自放開 背包 廣東話 講不夠」

興奮過後，吳林峰用上一個特別方式登場，台上朦朧一片，讓大家閉上眼晴，靜心欣賞佢既歌聲，佢亦不負所托，富感情地演繹《俄羅斯套娃》，令人動容。及後再唱出兩首感動之作，讓大家更認識依位實力唱將。

「香港歌手不會死」

壓軸出場既Eason一開聲已經有種帶動全場既感染力，The Duo Band亦係無可挑剔，世界級和音同樂器演奏，真正做到認真地玩音樂，同時將歡樂帶比每位觀眾。最後以《可一可再》唱出成員間深厚既愛，為音樂會畫上圓滿句號。

「愛是這樣 你認識我 只盼望每個都發亮」

整晚可以話係完美既聽覺享受，神級歌手陣容，驚喜滿滿歌單。每位歌手同樂隊成員都表現得非常出色，一起音樂已經有與別不同既感受，仲有好多首我喜歡又未聽過現場既作品，非常滿足。

以幕後音樂人作主題既作品展相當罕有，即使唔同歌手唱各自既作品，但細聽又會發現有唔少共通點，係特別又珍貴既體驗。比較可惜係當晚為數唔少既觀眾遲到，同埋喺演唱途中行嚟行去，頗影響觀感，但無損表演既精彩。

「算一算日子 我都有需要幫你點 要發的光」

Carl叔擅長於發掘藝人特色，讓佢地發揮得更完美，亦跟得上時代步伐，作出不同嘗試。佢出品既歌曲有一部分都異於主流，可以話係開創先河，為樂壇帶嚟更多新元素。

能夠喺樂壇屹立三十年絕對唔簡單，監製既貢獻雖然無曲詞編咁容易比大家留意，但從歌手們既感謝可以得知Carl叔既重要同地位。

感謝王雙駿一直默默為廣東歌付出，期待你繼續寫下傳奇。

片一：《砂之器》

片二：《You First》

片三：《桃色冒險》

片四：《雌雄同體》

片五：《潛龍勿用》

片六：《活著Viva》

片七：《捱麵包的人》

片八：《可一可再》

因為我今次個位比較遠同側，所以拍啲片麻麻，請大家見諒🙈🙏🏻

▼Follow hkmoviegoers
Instagram: https://www.instagram.com/hkmoviegoers/