AirPods助奧運滑板選手奪冠貼合度更令人讚嘆

唔知大家有冇留意今屆奧運嘅滑板項目呢？日本選手堀米雄斗喺今屆巴黎奧運滑板項目摘金之後收獲唔少粉絲，連喺佢比賽時著嘅波鞋都被人炒貴4倍，但令人更關注嘅係佢喺比賽時戴緊嘅AirPods。

今屆嘅滑板項目喺巴黎嘅康科德廣場舉行，日本選手堀米雄斗喺第四輪結束嘅時候排名只有第七，但佢喺第五輪成功以高難度技巧反敗為勝，連續兩屆奧運取得金牌。另外有人發現堀米雄斗喺比賽期間戴住入耳式藍芽耳機，經過網友嘅推測，堀米雄斗戴緊嘅就係Apple嘅AirPods Pro。大家都好好奇當時堀米雄斗聽緊啲咩歌，但堀米雄斗接受採訪嘅時候表示自己當時冇播任何歌曲，咁做只係想自己可以更專注比賽。堀米雄斗簡直可以話係將AirPods Pro嘅降噪功能發揮到最大效用啊！

其實好多滑板選手都會選擇戴住耳機比賽，今屆仲有選手喺比賽期間戴住頭戴式耳機，但就喺做緊高難度動作嘅時候成個Headphone飛走咗，所以令唔少人都驚嘆AirPods經歷完咁激烈嘅動作都仲可以戴得咁穩固，今次堀米雄斗真係無心插柳柳成蔭，令Apple得到一個免費廣告啊！