The Commune｜無死角！全落地玻璃270度無敵維港海景！Cafe價錢係K11 ARTUS食Lunch？！

期間限定捲捲意粉套餐+推介波士頓龍蝦捲捲意粉

呢間隱藏於K11 ARTUS的餐廳，全落地玻璃270度坐擁無敵維港海景，海天一色真係望住個景都已經醉醉地！最近推出期間限定「捲捲意粉套餐」，CP值超高，$368就歎到包含湯或沙律、主食及特式飲品。主食可選新鮮波士頓龍蝦、紅酒燴牛面頰或明太子北海道帶子，再配捲捲意粉或吸管意麵，自由配搭想點食自己話事。捲捲意粉配新鮮波士頓龍蝦尤為出色，龍蝦肉鮮甜爽彈，麵身均勻掛滿醬汁。另外明太子北海道帶子配吸管意大利麵，明太子分量充足毫不孤寒，帶子兩面微微煎香，中心保持鮮嫩。另外設有K11 MUSEA 免費泊車，食飽仲可以順便shopping滿足心靈。

▲椰菜花忌廉湯，口感順滑綿密，帶點堅果香。

▲沙律，沙律菜新鮮爽脆配黑醋好醒胃。

▲新鮮波士頓龍蝦配捲捲意粉(另加$120)，龍蝦每日限量供應，龍蝦肉質鮮甜爽彈而捲捲意粉螺旋形狀好掛汁，咬落煙韌有彈性，每一啖都充滿龍蝦嘅精華。

▲明太子北海道帶子配吸管意大利麵，明太子醬濃郁鹹鮮又creamy，帶少少辣味。北海道帶子鮮甜嫩滑，吸管意粉煙韌掛汁，層次豐富。

▲藍蝶花之夢(左)，層次分明，上層鮮艷藍紫色夠搶眼，味道酸甜好清爽。日出港岸(右)，充滿不少果肉，味道微酸。

▲蘋果金寶蛋糕配雜果(另加$98)，外層非常酥脆，中間夾著香甜蘋果肉入口軟滑，帶果肉咬感。

▲朱古力心太軟蛋糕配雲尼拿雪糕及雜果(另加$88)，蛋糕外層微脆，內裡充滿熱騰騰朱古力流心。味道濃郁，入口滑順配凍冰冰雪糕有多重滋味。

▲餐廳以全落地玻璃，270度坐擁無敵維港海景，海天一色真係望住個景都已經醉醉地！

The Commune

地址：尖沙咀梳士巴利道18號K11 ARTUS 10樓
電話：51001788
營業時間：12:00-17:00
供應日期：即日至10月31日

文字：香港人遊香港