美斯缺陣｜主辦單位Tatler是誰？各方危機處理多面睇

（本文獲原創者授權轉載，文章題目由LINE TODAY編輯所擬。）

可以令到一件香港體壇盛事演變成香港恥辱兼國際花生，相信政府同主辦單位事前應該點算都算唔到。

今次「國際邁阿密」對港隊表演賽由城中著名媒體Tatler主辦，得到政府大型體育活動事務委員會頒授「M」品牌活動，並獲政府撥款1,500萬，另100萬場地資助。門票最平$880，最貴$4,880，一開售就已經火速售罄，黃牛飛仲炒到差唔多成萬蚊一張。

賽事當日仲為咗炒熱氣氛，主辦單位有錢到請埋已經係神枱級嘅G.E.M.同幾位本地歌手表演。入場睇美斯嘅亦全部個個有份量，包括一眾高官、名人如梁朝偉、劉嘉玲、運動員何詩蓓、驚喜嘅仲有前特首曾蔭權同埋前財政司司長曾俊華。睇到呢度，照計點都會係一場有聲有色嘅大型體育活動，亦絕對係政府一直好想向外宣傳「香港係國際盛事之都 」嘅黃金機會。

點知最後，煲咗咁耐嘅美斯全程無落過場，觀眾就坐足成日睇佢哋表演坐凳，嬲到當堂大嗌回水。同時喺屋企睇直播嘅觀眾亦喺FB、IG、 連登等留言怒罵。香港政府亦同日連出兩次新聞稿，意難平就當然啦，宣傳唔到香港不特止，仲無啦啦變咗條國際大水魚。

▶️舉辦大型體育賽事經驗不足
球賽主辦單位係Tatler Asia，佢哋本身係一間 Tier one傳統媒體公司，上得Tatler嘅受訪者都係啲社會名流、富二、三代創業家、企業高層等等。基本上佢哋只會睇得起奢侈品牌，所以咁多年來都有無數品牌想痴埋去令自己個brand elevate 。

你知、我知、單眼佬同Tatler都知自己個logo好值錢，所以近呢幾年佢哋轉型做埋event production ，同唔同品牌「合作」—— 客仔俾大大筆錢Tatler搞event ，in return活動宣傳刊物亦可以印上Tatler logo作為endorsement 。

其實Tatler搞ball、搞event係駕輕就熟，不過講緊嘅都只係啲private靚靚活動為主。今次籌辦Tatler XFEST，受眾嘅係廣大市民，活動係足球運動，而個scale 亦係佢哋前所未有嘅咁大，簡單啲嚟講全部嘢都唔係Tatler自己最熟行同最擅長去做。

由出事後嘅回應，睇得出事前主辦方完全冇諗過球星甩底後嘅Contingency plan ，例如唔踢波嘅會唔會可以出場講吓嘢，落草地繞場一周say hello等等。（啱啱聽楊潤雄講，原來上半場嘅時候Tatler仲係同政府講美斯會出席下半場，所以當時政府都未jump in，但完場前10分鐘Tatler先通知政府話美斯都係唔踢喇，成件事透明度極低，亦欠缺誠信）

▶️預期管理不足
Tatler喺賽前落足廣告，務求要令全香港都睇到呢場賽事，呢個月啲粉紅色廣告多到避都避唔到，電視、Meta Ad、大型billboard 、巴士到全港最大LED戶外廣告牌都用美斯做賣點，再配合埋政府推波助瀾一齊宣傳，簡直係將場盛事推到去最高點，包括票價，亦係史無前例嘅高點。

基於以上種種，賽前球迷同市民對於美斯嘅出場有極高嘅期待，應該無人諗到佢會no show 。有俾錢嘅固然係嬲到震——真金白銀比成幾千蚊你俾我睇呢啲？等咗咁耐，知你受傷都唔係expect 落場踢，但連行出嚟草地綁吓鞋帶say 句hello 都好丫，但佢又真係唔俾面到成場坐低。

無俾錢嘅（當然政府都係納稅人嘅錢）亦覺得件事唔合理到有侮辱成分，主辦單位絕對係責無旁貸，因為佢哋未能提前明確同市民同球迷溝通球星係有唔出場嘅可能性，最後導致大家極度失望同憤怒。

▶️出事後危機處理多面睇
【國際邁阿密】
喺賽事後全場噓爆嗌回水時，碧咸作為國際邁阿密嘅代表，都嘗試出嚟拆彈，親自繞場再同球迷自拍簽名緩解情況，應該係想主動同球迷示好，挽回一下球隊嘅形象，不過完全唔work 。另外領隊亦即刻開記招，講返因為兩位球星受傷而唔可以出賽，但除此之外真心感受唔到佢哋有咩歉意，就連本身今朝要去嘅啟德體育館行程都要取消。

【香港政府】
香港政府身為科水界佼佼者，除咗特首當場黑面之外，返到去仲嬲到出咗兩個post （新聞稿）發洩，講到明有機會抽起千五萬贊助。政界代表紛紛走出嚟加把嘴，立法會議員田北辰喺電台節目形容事件「離譜」、民政及文化體育事務委員會委員吳傑莊亦要主辦方「解釋清楚後續安排，交代合約有無訂明美斯必須落場」。

【主辦單位Tatler 】
出事前無諗contingency plan，出事後回應更加災難。當球迷嬲到仆街嘅時候佢仲係咁repost IG Story 兼delete 留言。出事後6個鐘先寫出一篇intern 級嘅statement，係咁重覆自己都好失望，唔單止sorry 都無句，就連所有後續如「正與球隊交涉及了解」、「與團隊商討下一步對策」、「承諾避免未來類似事件發生」等等都睇唔到，多年嘅品牌形象毁於一旦。

▶️ 下一步點做？
Tatler今次雖然都係黑仔，但事件亦明顯地反映佢哋能力不足，缺乏經驗統籌大型體育項目，亦欠缺誠實溝通同危機意識。 今日下晝Tatler 個記者會，如果佢哋無提出任何補救方案同道歉，相信日後都幾難再挽回政府以及其他品牌對佢哋嘅信任。

（編按：文章於Tatler記者會前發布，其回應內容可按此查看）