193鬧COLLAR粉絲　Ivy So希望停止罵戰：我唔鍾意嗌交

女團COLLAR成員蘇雅琳（Ivy So）今日（20日）出席活動，跟粉絲們大玩遊戲兼送禮物。談到聖誕將至，Ivy透露原先約好COLLAR成員一起慶祝，但因要為澳門倒數音樂會綵排，惟有將慶祝活動推遲，留待COLLAR成軍4周年時一起BBQ慶祝，又笑稱大家男仔頭，故成員間不會玩交換禮物，指若選禮物，買金粒是最實際，因金價持續上升，不過自己未有能力儲金，笑指未知媽媽會否有為她儲嫁妝。

Ivy指澳門騷戰衣仍未落實，自己則偏愛少布，但笑言純粹為方便跳舞而並非為性感，至於「叱咤」頒獎禮戰衣則以型格為主，談到外界指因師兄MIRROR因開騷缺席頒獎禮，令COLLAR獲獎機會大增，Ivy坦言她們出歌並非為獎，當然若能獲獎會更開心。

談到隊友王家晴（Candy）與天團ERROR成員郭嘉駿（193）早前傳出緋聞，但最後卻發展成193與COLLAR粉絲間的罵戰，Ivy表示事後有跟Candy傾談過，知道她一向有在通訊群組跟粉絲交流，問到是否為風波安撫粉絲？Ivy說：「唔關緋聞事，係粉絲之間嘅爭拗問題。（因為緋聞？）雖然我唔喺事件入面，但都唔想見到嗌交，因為我唔鍾意嗌交，無論邊一邊都好，對對方唔好再講啲惡意說話，亦唔好傷害到對方。（193鬧晒全部COLLAR粉絲，會唔會令你難做？）希望粉絲唔好受到傷害，唔好唔開心，粉絲好錫我哋，所以要保護粉絲。（你有冇同粉絲傾過？）有講兩句，順便傾吓偈。（叫粉絲若你將來有緋聞都唔好鬧？大方接受？）唔關事啦，無論乜嘢事都好，唔好鬧人就得喇。」她笑指自己也曾傳過緋聞，只要好好解釋便沒有問題，相信好好地講大家都會聽，問到是否暗指有人不好好地講？她即尷尬地說：「唔好屈我啦！哈哈！（係咪男方唔好好地講？）我唔係呢意思，我意思係粉絲好好，如果我哋好好地講佢哋會相信，所以唔好嗌交。」

談到女團Lolly Talk剛與經理人結束合約關係，問她可知對方是否拆夥？Ivy坦言希望對方不要解散，因自己也很喜歡Lolly Talk：「希望佢哋能夠繼續做多啲音樂，呢個係佢哋嘅夢想，夢想好珍貴！」她表示近日也有重看《全民造星III》片段，看見大家一起努力的樣子，很希望大家可以一起走下去。

東網網站 : https://on.cc/東網Facebook專頁 : https://www.facebook.com/onccnews/