《無用的謊言》拍出新鮮感　為港劇帶嚟新元素

改編劇集《無用的謊言》喺上星期圓滿結束，作為無睇過原版嘅觀眾，我係非常喜歡依部作品，特別推介比想休閒地搵套劇欣賞嘅人！
（以下有劇透）

「人類情感 多少帶著疑心 怎麼對待諾言 如何衡量信任」

劇本圍繞聽出謊言能力同一單謀殺案，節奏唔算太快，可以一邊推測案件兇手，一邊見證男女主角純真甜蜜嘅愛情萌芽。

故事加入眾多有趣情節同角色，令氣氛唔會太沉重，睇得舒服又有追看性。最尾個轉折更加係相當震撼，合乎情理但意想不到。

「我們來測測謊 甚麼不怕親口講 我們來測測謊 換到暫時的心安」

劇情以外，劇集亦帶出一點反思。謊言雖然看似負面，但都要睇動機同背後原因，善意嘅大話其實係必需存在，甚至對人對事有好處，發人深省，值得大家深思。

「編造的世界更風光 沒問題 沒狀況 胡言亂語 掩飾以為善意的謊」

姜濤做文祖和依個角色非常合適，同佢真人一樣都係怕怕醜醜，卻帶點氣場，喺適當時候又會表現到一份自信。即使背負嫌疑，依然保持親切善良，甚至甘願承擔，幸好有芊雨一直在旁，令佢能夠一步步走出陰霾。睇得出姜濤嘅演技開始變得成熟。

不過數到最亮眼一定係Yoyo，性格得意調皮，開朗背後卻要面對又愛又恨嘅能力。整個角色同佢嘅演繹都非常自然討喜，不自覺就被吸引。佢絕對係我近年最喜歡嘅女演員之一！

「秘密能怎麼包裝 真相哪裡安放 是對是錯 我們無需一個定案」

一眾配角同樣搶鏡，當中我最喜歡一定係Stanley同Thor，佢地一如既往地表現出色，做大大小小角色都游刃有餘，絕對值得有更多機會。而193造型同性格稱得上係從影而來最大突破，做到失去人生支柱個種頹廢同絕望，繼而演化成暴躁嘅感覺，令人望而生畏。

演員們精彩嘅發揮正正成就依部佳作。

「出於愛的欺騙 只可以說 是我這刻僅有的體貼 這樣純潔的勾當」

由《大叔的愛》、《社內相親》到《無用的謊言》，依幾套改編愛情偶像劇都拍得出新鮮感，亦加入不少香港特色，為港劇帶嚟新元素。個人推介下次可以拍《背著善宰跑》或者《淚之女王》！

▼Follow hkpopculturelover
Instagram: https://www.instagram.com/hkpopculturelover/