娛圈單打︱春宵一刻輸鑊甘　食完女神難翻身

唔通叫親「BOYZ」嘅男團都零舍唔生性嘅？香港就唔好講啦，新進韓流男團THE BOYZ成員、26歲嘅周鶴年亦搞到周身蟻，最終被公司割席拋棄！衰乜呀？之唔係色字頭上一把刀囉！

又難怪嘅，皆因「對手」係前AV暗黑女神明日花綺羅呀，26歲仔血氣方剛，點頂喎。是咁的，日本《週刊文春》拍到周鶴年上月底某晚，與日本友人喺六本木酒吧通宵狂歡，期間與明日花綺羅舉止親密，又攬又錫，女神仲將香腮輕靠周鶴年肩上，旁若無人。經紀公司其後收到日方查詢，周鶴年無從抵賴，起先諗住溝吓女啫好小事，只係暫停團體活動，點知單嘢仲有下文，原來二人涉及性交易！此舉喺南韓屬違法，咁冇得傾啦，公司即時解約徹底放棄，以免累街坊。

喂呀，今鋪真係春宵一刻抵萬金咯，出道冇耐就因為咁樣前途盡毀，都唔知抵唔抵！有男網民就好體諒，話晒對方係明日花綺羅，忍到至奇！惟有講句：明日花下死，做鬼也風流啦！

之不過，亦有唔少網民大感驚訝，意想不到前AV女神引退後原來都要繼續「賣」！計本欄話齋，有乜出奇吖？唔使開飯咩？唔係人人好似三上悠亞咁識諗，一早鋪路做生意瓣數多多，唔趁仲有幾分姿色名氣賣多兩鑊，遲吓想賣都冇人買啦。

呢，今次都唔係綺羅第一次搭上人氣偶像啦，阿姐佢曾與選秀節目《Peak Time》參賽者Karam爆出床照；韓星姜丹尼爾亦曾傳出，偕綺羅現身江南一個私人派對。周鶴年事後發出親筆信，堅決否認買春激戰，粉絲則灌爆綺羅社交網，鬧佢不知羞恥喎。

東網網站 : https://on.cc/東網Facebook專頁 : https://www.facebook.com/onccnews/