馬拉松與人：Sing Sing 柏林馬拉松
Berlin Marathon 2024 🇩🇪🇩🇪🇩🇪
Chip time 3:42:27
要好好記錄一下今次超額完成嘅奇蹟
第一隻台北初馬同Sub4擦身而過，第二隻又傷咗咁去跑咗隻名古屋，第三隻我同自己講要俾心機跑好啲！🔥 於是乎開始諗吓點部署？不如今次認認真真去跟個教練練習？希望可以跑個Sub4返嚟🤔！
亦係今次我最要多謝嘅人@yu_hin_wa。
多謝你收咗我呢件垃圾，多謝你為我度身訂做嘅program，多謝你一路以嚟嘅訓話，多謝你我成日超速、唔聽話、都冇放棄過我…係因為你，我先至可以跑到今次嘅成績🙇🏽♀️🙏🏽。
開始咗program第一個月對腳已經唔聽話，休息嗰兩個星期淨係可以慢跑同游水，好返啲又再繼續練習，再加上自己曾經有傷患，唔係ITB痛，就係條腰、hip flexor痛，最後連足底筋膜炎都走唔甩！可能我真係唔適合跑program😔，但係又唔甘心，為求保住對腳，唯有每跑一課就去做不同嘅治療…按摩、拉筋、物理治療、筋膜刀、針灸通通都有殺錯冇放過，我只係想繼續跑埋落去！於是呢幾個月只想爭取時間，除咗跑步同休息，連朋友、六親都不認，所有聚會、飯局都放棄去咗練習🥹。
香港夏天跑步真係同自殺冇分別，就算夜晚30幾度未跑已經爆緊汗🥵，好不容易捱吓跑吓20個星期嘅program終於完成咗😮💨。
比賽前一個月啲壓力開始爆燈💣，連IG account都deactivate埋，淨係好想靜吓，完全封閉自己，唔想再受外間嘅壓力影響😔，成個月瞓唔到覺，個腦淨係不停諗點樣可以跑好隻馬？有時候半夜會彈起身，今日要跑啲乜？跑咩pacing？跑幾多公里🤯…
到咗比賽前兩星期提早過去歐洲諗住可以順便旅行放鬆吓心情，點知上機前開始作感冒，睇定醫生攞定藥就出發🛫。比賽前一日應該係病得最嚴重，說話都唔想講多一句，鼻水不停咁流，咳到肺癆已經心知不妙🤒，最慘就係對腳仲係好酸軟！當個個好努力咁加碳🍝🍚🥖，我連胃口都冇，夾硬吞咗幾粒薯仔就算🥔，今次真係GG了！連打卡嘅儀式感都冇做📸🎽👟，第二日比賽用嘅嘢都唔想去執！當初嗰團火去咗邊？想試3:55已經打消埋，連可唔可以完成比賽都已成為問題💔💔💔。
比賽9:15am起跑，4:30am開始起身準備。頭暈暈嘅我，同自己講我想放棄，我連上線嘅勇氣都冇埋😰，拖住極度沉重嘅心情去到會場bag drop，排咗30分鐘先等到廁所，上線嗰一刻已經係9am，見到啲人已經準備好，我連熱身又未做、筋又未拉，唔好理啦，做得幾多得幾多🤦🏿♀️°
一開跑根本就冇諗過用咩策略！淨係叫自己放鬆啲，頭5K當熱身睇吓自己咩狀況先。排D區，時間係3:00-3:15區間，不停咁提自己唔好俾人帶快💆🏻♀️，當其時凍到腳趾已經僵硬🥶，都唔理得咁多，keep住自己嘅節奏去跑，過咗10K好似好返啲，但係提自己唔好再加速，唔知道對腳可以頂到幾耐🥹。
10K -20K開始懷疑自己嘅能力，我真係跑得晒咩？再諗吓教練教過我嘅嘢，20個星期嘅訓練唔想白費咗教練嘅心機！喺外國跑馬真係唔係人咁品，試過想埋水站俾人推開，啲人喺你面前左穿右插🫣…
過咗頭半馬仲驚，比賽先係正式開始！預計自己對腳半馬開始會痛，又懷疑自己嘅能力，過去嘅長課最多只係跑到27K，真係可以完成到咩？奇怪嘅係對腳一啲都冇痛過，狀態仲好過練習嘅時候！係迴光返照吖😱😱😱，嗰一刻唔敢相信呢個狀態係自己，對腳好似停唔到咁一路推自己走！係咪靈魂出竅已經死鬼咗？俾人上咗身？定係學咗神打？
最後嗰5K因為之前嗰日參加咗大會嘅shakeout run，路線一樣，好似俾咗個預賽俾自己。雖然體力開始下降，再提提自己要keep住個form，控制呼吸。鼻水一直咁流，又唔識飛劍，淨係好想快啲完成佢返去擤鼻涕🤧，當知道自己如無意外可以Sub4到，心情終於放開咗！感受吓側邊嘅氣氛，但千祈唔好魯莽，一不留神PK點算🫠？
最後1K終點在望啦🤩醒呀！我唔係發夢呀！開始為自己喝采歡呼，冇諗過自己真係可以踏上六大馬呢個大舞台🎊！
衝咗線嗰一刻，撳停隻錶，第一時間梗係擤鼻涕！！！忍咗我42.195K啦🤧🤧，其實嗰一刻仲未好確實自己跑咗咩時間，淨係知道PB咗，已經心滿意足！
隨即收到各位嘅message恭賀🫶🏽！跟住就收到教練嘅訊息，嗰一刻終於忍唔住爆喊到收唔到制同教練報喜😭😭😭😭😭😭😭！
直到今日我都唔敢相信呢個奇蹟！從來冇諗過冇腳痛、冇抽筋、冇撞牆會跑到呢個時間！病到七彩可以順利完賽已經偷笑！感恩今次有條好賽道、好天氣而造就咗今次嘅比賽💯💯💯。
最後要多謝嘅人特別多，多謝你哋一路以嚟嘅支持同鼓勵，多謝你哋陪我跑過每段路，多謝你哋教過我嘅嘢…一切一切在心中🫶🏽🫶🏽。
雖然到目前為止我依然好憎跑步🫢，但係因為跑步教識咗我咩叫堅持同努力！亦因為呢份滿足感驅使我想繼續跑落去，繼續去進步，繼續去接受挑戰！我唔係要跑到，我仲要跑得好🔥🔥🔥！
下一站東馬見🇯🇵🇯🇵🇯🇵👋👋👋！
Please follow Insports Hub on Facebook & Instagram
https://insports-hub.com/
FB
https://www.facebook.com/insportshub
IG
https://www.instagram.com/insportshub/