P1X3L !OMG LIVE 2024　等到頸都長既Puzzle帶嚟精彩一夜

經歷幾年高低起跌，數次願望落空，P1X3L終於舉行首個團體演唱會，僅此一場，為一班等到頸都長既Puzzle帶嚟精彩一夜。

「誰人曾笑我 卑躬屈膝這麼低下 回頭來看我 披荊斬棘分出高下」

一踏上舞台，三位已經火力全開，用幾段勁歌熱舞，火速帶觀眾進入整晚狂歡派對。緊接solo同小組環節各顯特色，令人眼前一亮。

Rundown完全係粉絲福利，演繹曬推出既作品，仲有唔少驚喜。當中我最喜歡動漫主題曲medley，以青春活力勾起大家童年回憶，氣氛熱烈又聽得開心。其他cover作除咗展現跳唱實力，仲透過音樂表達對人生以及成長既想法。

最後encore環節更加完美地錦上添花，讓觀眾可以同三位更近距離接觸。喺我面前跳《Braceless》正到無野講，成個星期不停loop佢地一齊跳個段(片九)。

「This is how we roll 隨著拍子起舞沒煩惱」

三位表現出色，駕馭到整個舞台，跳唱又型又齊，睇得出彼此關係良好，默契火花十足，仲非常珍惜依個機會。Live或者尚有進步空間，但充分感受到三子滿腔熱誠，亦開始散發星味，最緊要係有團魂。

Phoebus一企出嚟就係美男明星，唱live穩定咗唔少，充滿感情，特別係《孤獨先生》，將歌詞既痛唱進內心，令人動容；

George表演得型格瀟灑，帶點壞男孩氣質，非常吸引眼球，唱功更有明顯進步；

Marco由以往感覺只係一個大細路，到依家演繹開始變得成熟，但又保留到青春可愛同鬼馬性格。《海島與少年》正正唱出佢心境，亦係我去年非常喜歡既作品。

「Wherever you are擔憂拋開 盼你心內所愛 一切都未改」

P1X3L從出道初期發展平平無奇，不被看好，及後久久未有新作，甚至被認為投閒置散。即使面對眾多不如意，三位依然努力堅持，喺綜藝、劇集等方面不斷爭取機會，同時無忘記跳唱本份。今次演唱會成功證明佢地外貌實力兼備，稱得上係捱出一片天，值得受到肯定。

坦白講我初時都唔算太留意P1X3L，畢竟當年佢地實在有點唔起眼，但慢慢發現三位成員各有魅力，仲逐漸被不同作品吸引。團歌包含各種題材，首首高質，個人作亦搵到適合自己既風格。睇完今次演唱會後更加喜歡依三位偶像。

由《造星2》認識佢地，到今日在場見證依個重要時刻，難免有點感動。未來最希望可以三為一體再出多啲團歌，絕對會越嚟越受大眾歡迎！

「根本不介意 擠逼都市像有點失智 迷迷魂魂 十二萬轉 oh oh oh」

最後，依個係我最後一個九展演唱會，彷彿為整場表演增添多一重意義，已經好唔捨得依個場地了。

P1X3L Good Show！！

▼Follow hkpopculturelover
Instagram: https://www.instagram.com/hkpopculturelover/