張頴康效力無綫19年宣布離巢　「我係劉德華同TVB栽培出嚟」

現年43歲的張頴康早年獲劉德華公司發掘，於2000年入行，初期有「劉德華契仔」之稱。直到2006年在劉德華推薦下加入TVB，工作至今19年。張頴康於今日（11月10日）凌晨在社交平台發文，宣布離巢TVB的消息：「19年前，華哥（劉德華）安排咗我加入TVB嘅訓練班，希望我可以好似佢同家棟哥哥一樣，接受TVB木人巷嘅訓練！我好記得入TVB前，家棟哥哥同我講咗句說話：『入到去，乜都唔好理，耷低個頭就做，你一定會學到嘢！』確實，遵從呢句說話，19年後我真係成為咗一位實實在在嘅演員！多謝華哥同家棟哥哥！」。

張頴康在TVB的發展不錯，於2016年憑劇集《一屋老友記》在《TVB 馬來西亞星光薈萃頒獎典禮2016》首次奪得「最喜愛 TVB 飛躍進步男藝員」獎，此角色還讓他首度獲提名《萬千星輝頒獎典禮2016》「最佳男配角」並奪得「飛躍進步男藝員」獎。張頴康在帖文最後提到：「我終於可以好自豪咁講一句：『我張頴康，係劉德華同TVB栽培出嚟嘅演員！』各位戰友，江湖見！」

張頴康全文如下：「再見了TVB！所以喺TVB嘅最後一日，影咗啲相留念！19年，真係一個唔短嘅日子！拍完最後一個鏡頭，原來眼淚真係會忍唔住留咗出嚟！19年前，華哥（劉德華）安排咗我加入TVB嘅訓練班，希望我可以好似佢同家棟哥哥一樣，接受TVB木人巷嘅訓練！我好記得入TVB前，家棟哥哥同我講咗句說話：『入到去，乜都唔好理，耷低個頭就做，你一定會學到嘢！』確實，遵從呢句說話，19年後我真係成為咗一位實實在在嘅演員！多謝華哥同家棟哥哥！」

「同10年前我攞飛躍進步男藝員上台時講嘅一樣，我要多謝家豪哥，小青姐，黃偉聲，張乾文，陳志江，方俊釗！多謝你哋俾咗好多機會我，成就我演出咗多個感動到觀眾嘅角色！喺最近呢幾年，我好慶幸可以同77工作室合作多部劇集！我特別要多謝佳哥（鍾澍佳）對我嘅支持同鼓勵，令我愈演愈有信心，讓我喺呢兩年內對演戲領會到另一個層次！多謝TVB！多謝你俾咗我一個咁好嘅平台，讓廣大嘅觀眾認識到我呢位演員！多謝你俾我認識到我眼中獨一無二嘅東張女神麥雅緻，然後仲成為咗我嘅老婆，俾咗我一個幸福完美嘅家庭！好喇！19年後嘅今日，我終於可以好自豪咁講一句：『我張頴康，係劉德華同TVB栽培出嚟嘅演員！』各位戰友，江湖見！」