陳柏宇《我所看見的未來》 用歌聲為大家帶嚟溫暖與希望
《我所看見的未來》以所謂末日作引入，用歌聲為大家帶嚟溫暖與希望。
「這夏季 在某日某人夢到災劫 就似網路說 地殼大震動海水滔天」
近年天災人禍不斷，災難嘅預言更加充斥大家腦海，連出遊都要思前想後，生怕會遭遇不測。然而，預言最終並無發生，末日依然係從未出現嘅謠言。說到底都係內心恐懼作祟，將一個未經證實嘅消息無限放大。
「看未來 若你最後看得難過 我預言 為你努力也一齊經過」
「末日」過後，我地仍然要如常生活。未來總會有不同事情令人擔憂，的確難以樂觀面對，但要緊記不論難過或迷失，世界如何昏暗，身邊定會有人與你分擔，只要一齊努力同相信對方，就能夠攜手捱過。
「若你信沒有 沒有人理會無需爭拗 哪需要擔心天會塌 難睡覺」
世界好大，太多事情我地無法控制，特別生活喺依個城市。我地可以把握嘅就只有眼前，活在當下，集中於你能看見嘅未來。與其為未知嘅預言擔驚受怕，倒不如珍惜時間，同身邊人過好每天。你相信明天有希望，希望就會出現，只要有愛，所有問題都自然會迎刃而解。
「今生有愛 你共我氣息尚在 憑著愛 找到自在 全面下載」
《我所看見的未來》氛圍相當特別，前段先有點灰濛嘅感覺，陳伯再逐漸以成熟嘅聲線，淡然溫柔地唱出盼望。配上MV美麗嘅日本景色，令作品加倍動人，聽完內心係有份難以形容嘅感動。
陳伯今年幾首作品主題不同，但同樣高質，出道多年依然不斷尋求突破，實在係樂迷福氣。
「看未來 望你最後看風雲過 我預言 為你努力再艱難都經過」
下次當你面對未知嘅恐懼時，不妨先抱一抱身邊人，一切其實未必有你想像中咁可怕🫂
《我所看見的未來》陳柏宇
曲：Ariel Lai
詞：梁栢堅
編：Ariel Lai
監：Edward Chan、Ariel Lai
「看未來 望你最後看風雲過
我預言 為你努力再艱難都經過
來日再探訪 明月照他方
人類都不分你我
最終找到愛去突破」
▼Follow hkpopculturelover
Instagram: https://www.instagram.com/hkpopculturelover/