喱啲塔羅 仍然要相信愛情故事

人多數會在什麼時候去占星塔羅？是頭頭碰著黑的運滯時刻、身邊無人理解的孤單時刻，還是準備作出人生重大決定的轉捩時刻？原來使香港人最百思不得其解，牽腸掛肚得要找塔羅師尋求答案的，是「愛情」這件沒有標準教科書，使人又愛又恨的事。

數年前的疫情時期，棍兄自學塔羅成師，隨後創辦「喱啲塔羅」，從塔羅與星盤當中，見過愛情的千百種模樣。不論是曖昧熱戀失戀，正緣暗戀苦戀，他都在牌面之上與客人口中，窺探過箇中的柔情密意或痛不欲生。

人是為了戀愛和革命而生

棍兄向來主張不應神化塔羅，在他眼中，占卜可以貼地、實在且百無禁忌。重要的從來不是繁文縟節，而是客人前來占卜的態度必須認真：「（態度係）隨緣嘅話，你唔使問呢啲，唔使嘥呢啲錢；我覺得『隨緣』好似係令自己唔使努力嘅藉口。」

人類善變，愛情更是變幻莫潮。昨天還愛得要生要死，明天卻突然心動不再，心如止水；也許是因着愛情的不確定性，許多客人會找棍兄為他們「消災解厄」。表面上的問題是「我同約會對象會搞成點？」、「應該點樣處理呢段關係？」、「同伴侶鬧交之後點算？」；但棍兄認為，對於愛情，大家實質想弄清的問題只有兩個：一是「自己需要什麼？」，二是「對方在想什麼？」。

來找棍兄傾愛情，定是有問題想問。可是，前來的客人也不見得全然是為情所困：「有啲人想了解自己多啲，當係『body check』，睇吓點樣可以令呢段關係變得更好。就算係一段安好嘅關係，都一定有嘢可以做得更好。」

身為全職塔羅師，棍兄見盡各種「奇形怪狀」的愛情，這使他在理解自身伴侶的「奇形怪狀」時，反倒會多了一分同理與包容。問到他如何理解現今各種新興的相處關係（例如是開放式關係及多邊戀等）？棍兄如此說：「而家大家越嚟越追求個人意志，會更加諗多啲自己想要啲咩，而唔係隨便同人綁定一世。喺呢個思維底下，大家可能會更加追求自己嘅慾望，所以喺文化角度去睇，我都幾肯定情侶關係上嘅變化，未來係會越嚟越flexible。」

就著這個話題，棍兄侃侃而談，他指由於現正處於冥王星進入水瓶座的時期——冥王星代表一種砍掉重練的能量，水瓶座則代表人際關係。棍兄相信，未來數十年間，不論是家庭、朋友或是愛情關係，也會有著革命般的逆轉與變化，猶如一種在溝通上的破舊立新。

十分之喜歡 等不等於愛

在網絡上，縱然仍舊有情侶大秀恩愛，可是更多的可能是出軌或離婚的相關討論，這使香港的社交媒體上經常籠罩著一股愁雲慘霧，高呼「真愛」已死：「香港人對愛情嘅睇法的確比較消沉，大家可能俾太多唔好嘅故事嚇親，呢個係無法否認嘅；但係同時都係有好多好人好事，不論係客人嘅故事好，我朋友嘅故事又好，我都真係見到有好多所謂嘅真愛出現。」棍兄補充，不論是面對愛情或人生，都應儘量避免聚焦「傷心故事」，因為縱使當刻的狀態或塔羅牌面不盡樂觀，也總有尋找到出口的可能：「我看待命理嘅重點，其實唔係『未來』，而係你點樣去應對呢個未來，或者點樣去避免呢個未來，所以我係會用好多時間去講建議。」

有沒有儀式感？有沒有情趣？夠不夠浪漫？這些向來是戀人相處間的重大命題。人人對浪漫的定義各有不同，有人喜歡在酒店房間相依偎看繁華夜景，也有人偏好跑到海邊耐著強風觀星賞月。對於「浪漫」，棍兄則認為是情人關係中不可或缺的要點：「一段關係缺乏浪漫，係唔會稱得上係情侶，如果係咁啱好好傾，大家好投契，咁你做朋友做工作夥伴就得啦，但點解戀人係特登抽出嚟，就係因為當中有一啲粉紅感覺⋯⋯如果冇浪漫冇愛喺入面，係完全可以直接收檔。」

棍兄認為「浪漫」不是單指一些實際舉動，更多是指一種氣氛，一種感覺：「當你去送花，呢個舉動好似好浪漫，但其實你點樣present，係可以好唔同⋯⋯你嘅眼神、肢體、語氣，點樣塑造嗰種浪漫感覺，我覺得呢個比較重要。」若要製造浪漫，其實最重要還是想對方受落，有人建基於心思，有人建基於物質：「每個人對浪漫嘅定義唔同，係好人夾人。好多時候我們睇星盤去了解自己，或者了解人哋，其實就係你要知道人哋受溝同感受到浪漫嘅方式係點。」

迷失在這場愛情遊戲

聽過海量愛情故事，可是在客人訴說相處上的舉步維艱與患得患失時，棍兄還是會感到痛心非常；他認為，一段合適的關係，其實不會需要你去委屈自己：「嗰種委屈唔係純粹講緊對方會唔會踩低你咁簡單，而係你明知自己喺愛情上有某啲需求，咁喺你對住佢嘅時候，會唔會壓低自己嘅需求？成日講嘢之前都要思前想後，令自己好驚嘅話，咁就係委屈自己。」

愛與被愛，是件有付出未必有對等收獲的事。當我們在愛情這場遊戲中傷痕累累，猶如一頭迷途羔羊時，究竟怎樣才可以重拾信心，勇敢去愛？棍兄如是說：「的確有好多人會因為慘痛經歷而驚到不得了，唔再相信愛，然後推開晒所有緣分。呢個其實係好傻嘅一件事，但都好容易去理解，因為嗰種受傷嘅感覺，真係諗返都覺得辛苦。但如果調返轉，一啲識諗啲嘅人，就會知道個著眼點唔應該淨係放喺傷痛，而係我點解會受呢個傷？將來可以點避免受呢個傷？點可以揾到合適嘅愛情？」

冰封三尺，非一日之寒；一段感情走向破滅，也許雙方都經歷過許多不足為外人道的忍讓與傷痛。失戀之苦不止痛心疾首，更可能使人一蹶不振，陷入漩渦當中。對此，棍兄建議也許可以不用急著去尋找出口，反倒先暫時擁抱迷失，在暴風雨中好好休息，好好部署。

不要過分抗拒迷失，也許才是重新出發的第一步。

▼Follow 18/22
Instagram: https://www.instagram.com/1822hk/
Website: https://www.18-22.com.hk/
YouTube: https://www.youtube.com/@1822hk