鍾柔美再爆公關災難　被指對同事及粉絲冇禮貌

19歲的鍾柔美（Yumi），5年前參加《聲夢傳奇》奪季軍入行，向來以A0人設建立清純形象，但自從錯手在IG發布緋聞男友劉展霆從後攬實兼親吻的短片後，再被人公開昔日在校期間，與異性的親熱照片，形像徹底崩潰，星途受挫。縱使Yumi透過雜誌訪問聲淚俱下道歉，但仍無補於事。日前，她出席活動後，走向粉絲群拍照及簽名時，其私下態度便再次引起網民熱議。

一直被暫停工作的Yumi，因為劇集《臥底嬌娃》出街，她重新獲宣傳機會。而且在活動後，Yumi亦專誠走到粉絲群拍照及簽名，不過從粉絲上載的影片可見，不少網民就質疑Yumi的態度欠佳，亦被指無禮貌。首先，鍾柔美在準備簽名時，以命令式「零尾音」語調，直呼同事名字，要求替她拿住電話，前前後後更冇「唔該」等字眼。而在簽名期間，有粉絲要求「影張相，Yumi」，她以略帶不耐煩的語氣回覆︰「簽埋名先好冇？」該粉絲亦聽聽話話，自行打圓場：「好啊，一個個嚟。」

短短40秒的影片，兩句簡單回應，就令這個建立親民形象的大好機會功虧一簣，有網民覺得「啲神情真係串以為自己係啲咩Level」、「演藝生涯吊緊鹽水都仲咁串」。雖然攻擊不斷，但發片的粉絲完全不覺得有問題，更力斥網民「老屈」，「根本冇咁嘅事，係要咬住Yumi唔放，究竟幾時先肯收手？」「唔需要理咁多雜聲，做好自己工作」，更從短片中見到她拍照時有求必應，盡量滿足粉絲要求。