跑步與人：Ivy Chan

1. 跑步年資？為什麼開始跑步？
跑步約2 年，跑山1 年左右，我玩咗yoga 同gym 十幾年，完全唔跑步，因為疫情關係所有gym、yoga 關門，迫住落街慢跑 😝， 我本身好憎跑步㗎！（到而家都係🤣）

2. 最喜歡的跑步用品品牌？最喜歡的跑鞋？
路跑就 ASICS Magic Speed 3、Saucony Endorphin Pro 3；越野跑就 HOKA Speedgoat 5、Zinal、The North Face Vectiv Enduris 3。

3. 有沒有跟跑會或教練跑？選擇原因？
RMAC Wilson Sir – 因為港島近我，係我第一個接觸嘅越野跑班。
火車站 – 因為朋友介紹，師資優良，有火車 Sir、鷹鷹 Sir、Lucas Sir，經驗豐富；戰神班 – 都係朋友推介，上堂之後發覺 Joe Sir 會用心教導每一個不同程度嘅同學。

4. 日常跑步路線，最喜歡的練習場地（原因？）
路跑會去跑馬地馬場，而上山都係港島徑為主，最主要係地點方便我。

5. 最深刻的一場賽事？原因？
一定係今年嘅HK100 大滿貫，當初係想抽100k 但抽錯咗🤦‍♀️！ 心諗人生乜都試下啦，就報咗名。真係唔知自己可唔可以完成，決定玩之後就訓練back to back。

第一日 33k 比賽，要以好輕鬆嘅狀態完成，提醒自己要跑完好似冇跑過咁，輕鬆完成但也好彩能做到top10；第二日 56k 也 keep 住要輕鬆的腳步完成，完賽係比第一天攰啲，但冇加速。

第三日打大佬103k, 嗰朝已經feel 到有少少唔舒服，我用享受比賽嘅心情去面對，嗰日日間好熱🥵，差唔多中暑！頭57k 都輕鬆，到水浪窩狀態仍然ok，知道夜晚會凍換上薄外套，去到基維爾巳經好凍，到草山更凍，當時我覺得自己已經失溫，又反胃🤢、又嘔🤮、又頭暈，好唔容易先到鉛鑛坳，到終點只剩7k，當時諗又要上大帽山再凍過，我會唔會死㗎？但又諗已經玩左185k 唔通玩多次咩🤣？我同自己講點都要頂埋佢…最後順利完成✅！

賽後review 係自己冇經驗，睇少咗山上嘅天氣變化，幸好可以完成大滿貫😝！
真心好多謝嗰日幫我做support 嘅戰神、🍒、Eric ，佢哋第二朝要跑渣馬都留到咁夜做我support，就係為咗支持學生💪🙌！

6. 海外比賽跟香港比賽的分別？
我只去過一次清邁UTMB 玩50k，最大分別係唔熟識賽道，天氣變化更大，CP 嘢飲有冰㗎香港CP 冇冰🤣，同埋外國冇樓梯（香港特色特別多樓梯，但我至愛🤣）…

7. 最想到外國哪裏比賽？
去 Chamonix 玩 UTMB。喺網絡上見到當地嘅氣氛好好呀，今年會去 Chamonix 玩 CCC，希望下年抽到UTMB。另外，亦想參加世界各地嘅比賽如 Skyrunning 等等 , 順道可以去旅行，認識更多新朋友，擴闊視野！

8. 有沒有跑步傷患？如何處理？
幸好冇咩大傷患，冇睇過任何醫療，平時比賽完可能會用按摩藥膏或活絡油搽下。

9. 有沒有因為跑步而放棄了其他運動？
又冇喎！跑步係我新加上去人生嘅運動。

10. 除了跑步，有沒有做交叉訓練？（例如舉重/游泳/瑜伽）對跑步有沒有幫助？
我 keep 住做 yoga、室內單車、打拳、舉重等等，呢啲運動對跑步好有幫助，可以用到平時跑步冇用到嘅部位，亦可加強四頭肌、core 等唔同嘅肌肉，令雙腳冇咁易受傷，yoga 更加係重要啦，幫助拉筋。

11. 跑完步最想吃什麼？
其實跑完後乜都唔太想食，只想飲凍嘢😝。

12. 有沒有跑步偶像？原因？
Kilian Jornet 同 Courtney Dauwalter。欣賞佢地嘅毅力同心態，而且可以好好享受每場比賽但又可以取得好成績！

其實教過我嘅阿 Sir 們 – Wilson Sir、火車 Sir、鷹鷹 Sir、Lucas Sir 、戰 Sir 都係我偶像嚟㗎😍！

13. 現時跑步目標是什麼？
我本身唔太喜歡路跑，真係覺得好悶😝！但嚟緊可能要玩隻馬拉松（我連10k、半馬賽事都未參與過🤣），教練話要跑山跑得好，一定要路跑好，我真係要講句：Joe Sir「真係」冇迫我跑馬拉松🤣，希望遲啲可以跑到330 啦😝！越野跑方便希望可以挑戰自己更多，做出更好成績啦！

最後一題，有什麼社交媒體可以找到你？
IG: ivychan_430

Please follow Insports Hub on Facebook & Instagram
https://insports-hub.com/
FB
https://www.facebook.com/insportshub
IG
https://www.instagram.com/insportshub/