黃美棋離巢效力8年TVB　「依家唔走驚冇勇氣去闖」

現年35歲、童星出身的黃美棋於1994年起拍攝TVB電視劇，如《包青天》、《帝女花》等。之後以學業為重息影，直至2011年於美國大學後加入香港電視網絡（HKTV），2014年在電視劇《大眾情性》中首度擔任第二女主角。不過隨著HKTV不獲發免費電視牌照，她於2015年約滿香港電視網絡後，於2017年重返TVB。今日（8月21日）黃美棋於社交平台分享多張照片，以「等我放個震撼彈先」為首句，宣佈離開效力8年的TVB。

黃美棋在帖文中提到，其演藝生涯在1994年開始：「等我放個震撼彈先。我要正式離開呢個陪我長大再返黎追夢嘅地方lu。仲記得1994年，係呢度拍咗我人生第一套劇集：包青天。以前嘅tvb係清水灣，大概喺我14歲嘅時候，Tvb先搬咗嚟將軍澳電視城。HKTV開唔到台之後，我做咗幾年自由身…但係因為好想拍劇、最後決定返去TVB ……繼續呢個追夢之旅。」

黃美棋難忘連續4年做直播《歡樂滿東華》網上版主持：「喺呢度8年嘅日子當然有開心唔開心、有期待有等待有失望再期待，而我相信呢一種經歷基本上係每個藝人必經嘅階段……而我最大嘅收穫係做到幾個我好鍾意嘅節目，包括有香港美食一條街，大玩特玩、玩轉粵北粵東懶人包、搶食著數特攻隊等等，能夠遇到一啲欣賞我嘅監制同製作組，發掘咗我一啲綜藝喜感嘅小宇宙，仲有連續四年做到直播版歡樂滿東華嘅網上版主持，每次6個鐘頭嘅直播……成為咗我做直播節目嘅根基。」

黃美棋直言離巢有萬般捨不得：「『救妻同學會』係我好自豪嘅劇集，雖然每星期播一集，形式太新穎……不過我依然好記得拍攝嘅點滴，多謝監製Anthony 同o San , 所有導演PA們。呢一切都豐富咗黃美棋嘅人生！由一個大番薯，蛻變成為今日擁有有好多唔同節目、大show +直播經驗嘅藝人～雖然心裏面都有萬般捨不得，但係聚散有時，每件事情都有終結嘅一刻，而我就選擇喺呢個時間離開呢個『避風港』，留低最美嘅回憶～」。

黃美棋特別感謝司徒夾帶和自己的老公：「其實能夠喺離開前，同家燕姐有一個旅遊節目係天大嘅恩典。好感恩係咁多年黎每一位用過我嘅監製……導演……所有幕前幕後嘅工作人員，多謝你哋出現係我嘅生命中（特別係B哥、小慧姐、波爺、晴朗、肥祥、Clara 、 MR.R 等等……） 仲有我所有係公司嘅經理人：Winnie , Ida , Sandy, Monica , Sherin, Sherley。要多謝嘅人真係好多，請原諒我唔打哂（晒）出黎……不過有一個人係一定要多謝 @szetosifu多謝你當年帶我見B哥！多謝你幫我完夢……仲有我老公@ykyray 多謝你咁多年頂住我……撐住我……睇住我入tvb，再睇住我返出黎。陪我度過每一個時刻！」。

最後，黃美棋直言如果現在不離開，將來可能再沒有勇氣繼續去闖：「『外面風大雨大個市又唔好，留低好d 喎，起碼有份糧！』係嘅……外面的確係風大雨大（所以希望睇到呢個post 嘅PR 朋友們都多多關照小妹，盡情搵我做野（嘢））但係我都好明白，如果宜家唔走，我驚我再無勇氣繼續去闖……要有向前嘅勇氣呀。同埋我嘅離開唔代表我放棄演藝嘅路，我更珍惜所有嘅機會～同埋有更多天大嘅空間去創作。最後多謝公司呢八年黎俾我嘅所有機會，我拍咗條散水片㗎，過兩日有得睇。」