【拍拖】女兒校內拍拖斷正 學校要見家長 醒目阿媽一招化解危機兼贏盡民心
「中學生應否談戀愛？」這個問題沒有標準答案，但到了情竇初開的青春期，少年少女拍拖是很自然的事。不過，如果拍拖被訓導老師「斷正」，並需要見家長，怎樣辦？一名女學生正面對這問題，幸而她媽媽睿智地化解危機，讓女兒和一眾網民高呼：「阿媽你真係好得！」
Photo from 《久別重逢》劇照
在學校拖手被訓導主任「捉到正」
女學生在「名校Secrets 2.0」發帖：「我想借個機會讚揚下我阿媽！」，事主與高一級的男生拍拖，午膳時間如常在學校後樓梯見面，情到濃時忘形地拖了手，十分不巧，這一幕被訓導主任「捉到正」！「佢即刻拉我哋去訓導室，仲話要叫家長嚟傾。我個心即刻離一離，雖然阿媽知我拍拖，但煩到佢要嚟學校，點諗都應該唔會有好面色。」
事主媽媽如約面見訓導主任，主任嚴肅地說：「你知唔知佢（同）學校另一個男同學拍拖？」媽媽冷靜地回答：「知吖。」這一個意外回覆，讓主任當場語塞，呆了兩三秒後老調重彈：「喺學校範圍呢，對佢哋對其他同學都唔幾好……(下刪幾千字)……我覺得最好可以勸喻吓佢，以學業為重。」
Photo from 《非同凡響》劇照
媽媽「神回覆」擊破盲點
聽完主任一番話後，媽媽非但沒有附和，反而轉向事主，半帶幽默地說：「聽到啦？以後唔好喺學校範圍拍拖呀。」訓導主任還想繼續說，媽媽搶先表示︰「老師你知我個女啲成績架呵？我哋一直都以佢學業為重架，有冇個可能係，唔畀佢拍拖，仲影響到佢學業？」這句「神回覆」直接點破了傳統觀念的盲點，讓訓導主任面色一青。媽媽隨後更以退為進，承諾女兒在校內會收斂，「我保證佢以後喺學校會收歛，唔會影響到同學同老師你，ok？」並順勢邀請女兒的男友到家中吃飯，將一段可能轉為「地下化」的關係，引導至陽光之下。整個過程不慍不火，卻充滿智慧，完美化解小情侶被罰的危機，讓事主高呼：「阿媽你真係好得！」
Photo from 《某月某日》劇照
網民激讚：現代家長的典範
這篇帖文引發了網民的共鳴，留言區幾乎一面倒地讚揚這位「霸氣媽媽」。大部分網民認為，母親的態度非常正確，完美示範了何謂開明的現代家庭教育。「伯母就真係識做人，訓導都係打工，校規又唔係佢可以改，當場串佢鬧佢又點丫，咪盞佢一陣仲針對你。大家做下戲，話會收斂啦、會管教啦散場咪算，伯母好嘢！」、「有個咁嘅媽咪真幸福」、「霸氣而不失態」、「有冇可能唔比佢拍拖仲影響佢學業？簡直貼堂」。指當年父母若能如此，親子關係定會更融洽。
對於中學生拍拖，網民態度很開明，「成績冇問題，老師理鬼得你呀。家陣仲中學生不應談戀愛？out左十萬世啦下嘛！最緊要教識佢地保護自己」、「拍拖沒問題，但問題要教性教育」。有不少認同：「影響成績既係失戀」、「拍拖唔會影響學業，分手先會」，認為與其強硬禁止，不如像這位母親一樣，教導子女如何保護自己、如何拿捏分寸。
Photo from MamiDaily
發現中學子女拍拖怎麼辦？
1. 切勿驚慌：家長的第一反應，決定了子女日後是否還願意對你敞開心扉。青少年戀愛是成長的正常部分，將其視為禁忌，只會將孩子推得更遠。
2. 理解而非審判： 切勿劈頭就問：「成績點算？」，不如先關心子女的情感和相處情況。了解不等於認同，但理解是建立信任的第一步。
3. 教育先於禁止： 將重心從「禁制拍拖」轉移到「負責任的戀愛教育」。與子女坦誠地討論界線、尊重、時間管理，以及最重要的——性教育與安全措施。讓他們明白，拍拖是學習，更是一份責任。
如同文中事主媽媽，在面對學校等外界壓力時，選擇與子女站在同一陣線，能極大地鞏固親子關係。這份信任和支持，會讓子女在遇到困難時，第一時間想到向家長求助，而非隱瞞。邀請子女的伴侶到家中作客，更是將關係透明化、健康化的絕佳方法。
Text：Mami Editorial
Source：名校Secrets 2.0