混沌少年時影評｜鏡頭下的青春裂痕，悲劇誕自扭曲網絡文化：評Netflix現象級新劇《混沌少年時》
編按：文章標題由虛詞編輯部擬定
講在開頭，《Adolescence》（港譯：《混沌少年時》）絕對係家長應該睇嘅影集，如果仔女喺英國讀書就更必須要睇，不過睇之前先要大概了解現時英國嘅社會背景，亦要清楚網絡上點解要為呢套影集去拗。
唔好意思，又係長氣討論影視，因為呢套嘢背後涉及太多近期英國嘅社會問題。
就算未睇，大家都可能發覺由英國去到美國，無論輿論或者網絡都熱烈討論Netflix上星期上架嘅影集《Adolescence》，就連英國首相喺下議院答問大會中回應議員提問期間，都呼籲學校或者家長與學生子女一齊睇，討論影集中嘅議題，《Adolescence》喺英國社會談論度可以話係現象級別。
對於香港觀眾嚟講，可能會覺得《Adolescence》嘅故事大綱同之前上映嘅港產片《爸爸》有啲類似，同樣都係涉及父親如何面對犯謀殺罪嘅仔，但《Adolescence》探討更多嘅近年英國社會同青少年問題，包括家庭、父母、學校、校園同網絡欺凌、「宅男」沉迷扭曲大男人主義信仰、少年持刀襲擊等等。
13歲嘅內向「宅男」初中生Jamie用刀殺死咗女同學Katie，呢個唔係劇透，相信製作人同Stephen Graham的確參考咗近年英國發生嘅少年兇案，而影集要探討嘅就係背後嘅原因。响深入講《Adolescence》之前，希望大家先要明白點解美國嘅右翼KOL不停攻擊呢套嘢，話係DEI作品抹黑白人。事先聲明，本人從來都討厭「DEI左膠」文化，但今次我不能認同。要知道英國影帝級演員Stephen Graham係有份創作呢套影集，睇咗嘅朋友就會明白，根本無演員比Stephen Graham本人更適合演故事中爸爸呢個角色（如果有香港版就肯定係劉青雲），佢實在做得太好，演得太虐心。既然Stephen Graham自己演英國北部藍領爸爸，個仔當然就係白人（如果揾其他種族就真係DEI啦）。
而製作人搵少年演員Owen Cooper飾演13歲殺人犯就更無可挑剔，佢嘅演技就直情係天才級令人驚訝（特別留意第三集）。如果純粹因為呢兩個超班演員嘅膚色去批評《Adolescence》係「DEI左膠」嘅話，只能夠話製作人抹殺其他種族演員借呢套影集揚名立萬或者攞獎嘅機會。
講返影集本身，上架幾日就成為英國現象級話題作品，因為《Adolescence》可以兩個角度去欣賞。就算完全唔清楚背後探討嘅社會議題，剩係睇拍攝技巧同演技都已經好癡線。四集全部都係用一鏡到尾方式拍攝，講緊嘅唔係單一場景，而係室外到室內，然後再換地點，包括坐車交通都係一鏡過拍攝，理論上四集四個鐘就拍完。
當然唔係啦，拍攝、燈光、演員，只要任何一樣出錯或者唔滿意就要由頭拍過，例如第一集，根據Stephen Graham講就係第二take（第四集拍咗十四次），由警察集合，開車到13歲疑犯Jamie屋企破門入屋拘捕，帶佢去警局羈留，搜身、打指模、律師到場、落口供，一鏡過完整呈現少年罪犯被捕過程。
剩係鏡頭已經嘆為觀止，而所有演員更帶動住觀眾，特別係演少年兇手Jamie嘅Owen Cooper嗰種（好似）無辜嘅驚恐，同演爸爸Eddie嘅Stephen Graham，初頭以為警察拉錯人既擔心又激動憤怒，內心又有啲質疑個仔，一鏡直落同所有演員嘅演技變化，帶領住觀眾去了解Jamie點解會咁做，悲劇點解發生，背後發生咗咩事。
其實整套戲探討嘅就係社會、家庭、學校、網絡欺凌、社交媒體、針對自我形象差「宅男」嘅邪教式男性主義。四集講嘅係Jamie殺人被捕到受審期間十三個月，第一集就事發被捕，第二集講嘅係係校園，包括質素差嘅學校嘅教育同老師質素、英國年青人嘅社交網絡文化、校園欺凌，然後帶入近年好受英國男學生歡迎嘅Andrew Tate式大男人主義。呢點大家要明白，講嘅唔係華人社會理解嘅父權或者男主外女主內傳統觀念咁簡單，而係近年英美針對「溝唔到女嘅宅宅」（即係劇中講嘅"incel"）嘅扭曲網絡文化，事實上近期好多少年兇殺案都涉及呢個心態，而喺劇中，每個角色都被呢個文化同社交媒體風氣影響，分別只係身處其中嘅學生、唔知（無知）嘅家長、同埋唔想知嘅老師。
呢個文化嘅核心，說穿了就係慰籍嗰班自我形象低，覺得自己被女性睇唔起，自認溝唔到女嘅宅男，話畀佢地知呢個世界20%男人溝晒80%嘅女，要得到樣靚身材正（對佢地嚟講內涵內在唔重要）嘅女性認同，除咗要做Alpha male之外，宅男們要團結，貶低、侮辱、甚至以力量（包括暴力）消磨目標女性嘅尊嚴。
唔好以為呢啲概念只係影響咗男仔，女仔同樣受影響，因為社交媒體販賣嘅就係外觀，靚、身材好、有錢同名牌，要得到所謂20%「成功男性」，外貌身材比內在重要，同時亦要反擊嗰班中咗邪教嘅「毒L」（"incel"）。劇中無論兇手Jamie或者被殺嘅Katie，以至校中嘅學生都係呢種文化受害者，喺呢個文化下喺網絡互相欺凌，第三集心理醫生見Jamie，就完整展示佢嘅心路歷程，如何被呢類扭曲男性主義文化嘅洗腦。
學生喺呢啲網絡同校園風氣之下，家長又可以做咩？而故事主角Jamie嘅爸爸同屋企人，又點面對個仔係殺人犯呢個殘酷嘅現實？第四集就係探討呢個問題。
成套影集值得欣賞嘅就係呢度，無特意批判任何一方，因為兇手本人、同學、老師、學校、網絡、父母、甚至受害者或多或少都有啲責任，而慘劇只係所有一切嘅總和。
（文章授權轉載自作者FB專頁，原文連結：https://www.facebook.com/share/p/16MLHvUKLv/）
▼Follow 虛詞．無形
Website: http://p-articles.com/
Facebook: https://www.facebook.com/formless.particles