娛圈單打︱有人生仔話咁易　有人恨仔到發燒

遭網民戲稱「万刀甲」嘅方力申，搶先舊愛鄧麗欣，喺今年2月情人節，與圈外女友葉萱結婚，話咁快又有喜訊。上月父親節佢公布太太有咗BB，即將榮升人父，各界紛紛送上祝福。日前喺佛山開演唱會，再公開BB性別，原來係女！之但係小方似乎難以置信，頻呼「冇可能係女嚟㗎，我真係接受唔到」，仲話月尾再照超聲波，「睇吓有冇嘢凸出嚟」喎。

真係誇張！今時今日仲咁重男輕女都算少見，何況小方都係45歲啫，點解思想成舊古老石山咁、好似上世紀啲伯父咁㗎？粉絲就替偶像解畫，話小方都係搞吓笑啫，佢對女仔根本毫無招架之力，將來肯定錫到女兒燶喎。計本欄話齋，佢老婆得31歲啫，咁後生，生多幾個都冇問題，遲啲追多個仔，咪可以湊成「好」字囉。

不過都明嘅。正所謂男女共處一室，女仔實有損失。為人父母，對女兒點都操心好多，再加上中國人傳統觀念，都係渴望有兒子繼後香燈。好似郭富城吖，差不多六張咯，近日傳出成功追仔，老婆方媛成為美麗孕婦，兩個寶貝女好快有細佬啦，真係好開心嘅呢。城城又好，小方又好，基因優良，又有經濟條件，生夠一支足球隊都仲得啦！

講到娛樂圈多仔公，梗係不可不提Steven張致恒。佢就失敗咯，餓死老婆瘟臭屋，唔止冇錢交租面臨迫遷，老婆雯雯仲暗示無錢養仔，要將4個仔交畀保良局喎。雖然Steven否認，但呢家人澩咁嫪，小朋友就最慘！家陣仲細，當然冇咩嘢，第時再大啲，識上網睇八卦，會唔會畀同學仔笑，產生心理陰影，真係講唔埋。

東網網站 : https://on.cc/東網Facebook專頁 : https://www.facebook.com/onccnews/