《GO WITH THE FLOW 林峯演唱會 2025》

發布於 06月03日01:53

久別紅館舞台，林峯一連七場個人演唱會終於圓滿落幕，佢保持過往嘅水準，為樂迷帶嚟精彩一夜。
（我係睇 27/5 尾二場）

「我對你這一生哪個可比我與你差一些永遠一起」

演唱會先以耳熟能詳嘅《愛在記憶中找你》霸氣開場，緊接幾首快歌迅速帶旺全場氣氛，及後再演繹一眾抒情歌及經典作。坐山頂超近聽到《幼稚完》真係起曬雞皮；同吳林峰合唱《無傷大雅》比CD版更動人；《Let’s Get Wet》同娜姐嘅性感舞蹈更加為作品完美昇華。最後仲將紅館化成大型DJ party，high爆地完場。

「放手放開所有彼此更自由放手其實我絕非愛得不夠」

整晚歌單豐富，有新嘗試又滿足到大家想要回憶殺嘅心情。林峯亦好知觀眾想要啲咩，經常同大家近距離互動，照顧在場每一位，一齊享受依個派對。

「幾千天近況幸福嗎每日忙碌嗎仍然是那麼認真嗎」

林峯嘅舞台魅力真係爆曬燈，跳唱型到爆，唱功穩又有力量。作為第一次聽佢live嘅樂迷，雖然有啲喜歡嘅作品聽唔曬全首，但我依然非常滿足，亦屢屢被震撼。

「你在我記憶旅行每步也驚心跟你踏過許多足印捨不得轉身」

而要數到全晚我最喜歡嘅環節，必定係《記得忘記》。溫柔嘅旋律配上林峯演過嘅角色片段，頓時勾起好多回憶，當年睇依啲劇嘅畫面仍然歷歷在目。原來時間過得咁快，原來我已經長大咗咁多，原來林峯嘅作品承載咗我嘅童年同青春，個份感動係筆墨難以形容。

「如深呼吸貼近天空愛的心從天災戰事助人夢裡飛行」

對於我地整代人，林峯象徵咗一個時代，一個娛樂無咁方便嘅時代，一個tvb仲係套套經典嘅時代。每日準時坐喺電視前睇《溏心風暴》，要喺同學部iPod先聽到完整嘅《愛不疚》，喺重播時段先第一次睇《天涯俠醫》，比《不速之約》嘅邰風嚇到訓唔著，一幕幕到今日我依然印象深刻。

我唔敢話依個時代比現在好，但絕對係一段珍貴又值得懷念嘅美好時光。當時嘅快樂好似比較簡單純粹，我非常慶幸可以喺依個環境下成長。

「轉身必須比眼淚更早彷佛你亦知道」

時代巨輪只會無情向前，過去亦只會一去不返，感謝林峯帶我走咗一趟回憶之旅，讓我同樂迷們可以喺音樂中懷緬同感慨一下🫶

片一：《愛在記憶中找你》