Apple開發對講機技術免網絡雲端亦可即時通話

你這剎那在何方～我有說話未曾講～有咗Apple呢個新技術大家就可以隨時隨地訴盡心中情啦！Apple最近成功開發唔洗透過網絡而進行即時通話嘅新技術，就好似對講機咁，而且Apple仲為呢項新技術申請緊專利！

喺新公佈嘅專利申請入面，Apple詳細咁說明咗呢項技術允許用戶選擇一個又或者多人進行即時通話，基本上可以話係「通話版嘅AirDrop」，新技術同AirDrop一樣唔需要用戶透過網絡或者雲端去使用，就可以同附近嘅用戶對話。另外，Apple表示新技術將會利用AirTag同樣嘅技術，喺iPhone上面按照距離列出附近嘅用戶，只要點一下用戶嘅名，而佢又允許接收嘅話，你哋就可以即時通話㗎啦！

Apple Watch亦有相同嘅對講機功能，但就需要有網絡先用得，所以新技術亦算係Apple嘅一大突破，不過會唔會受到距離嘅限制仲係一個未知之數。可能有人覺得呢個功能有啲廢，直接打電話咪得囉，不過我就幫大家諗到個用武之地啦，如果你喺街見到個幾正嘅異性，又怕醜唔敢直接走去撩人講嘢，就可以利用呢個功能同佢開話題啦！（前提係佢允許通話）但係大家失敗咗嘅話唔好話係我教嘅～