【港足人語】難忘豐收的一年 陳肇鈞：努力就係要一直累積

【獨媒報導】在過去一年，陳肇鈞代表港隊在亞洲盃決賽周射入賽事第1,000球，贏得四料香港足球先生。這名香港足球先生去年曾遇上職業生涯危機，經歷過半年無班落，一年後走上職業生涯高峰。在硬朗的背後，陳肇鈞付出了很多力氣對抗「不想放棄」，他接受《獨媒》訪問，形容今年是難忘、豐收的一年：「意外嘅係代表港隊同大埔都有好成績，唔意外嘅係，努力就係要一直累積，上天俾返我嘅一個認同，無辜負到自己一直嘅努力。」

10年前後 嘆做運動員成功機會率好低

故事或要從10年前說起，陳肇鈞在2014年曾接受《獨媒》訪問，他當時正在港大唸書，斬釘截鐵說畢業後不會從事運動科學的工作。在10年後，32歲的陳肇鈞回望，認為「呢條路好錯」，因為在香港做運動員的成功機會率好低、好難：「如果喺外國，我會踢波，退役後做返運動科學，因為運動喺其他地方係產業，香港只不過係娛樂嚟。」

陳肇鈞不諱言，如果回到10年前，相信會喚自己不要再走下去：「因為太無保障，個追夢有一日係會終止，當年識諗，可能早啲終止會好啲。當然今日捱到出嚟，有啲嘢交代到。」這份悲觀，不無原因。

「無班落」拒看港足新聞 重返港隊成「一千鈞」

在前年不獲傑志續約後，陳肇鈞頹足半年，人生失去了方向。在頹喪期間，陳肇鈞選擇去旅行、釣魚及客串講波。他拒絕看香港足球的新聞，因為對球圈感到不樂觀：「我唔係放棄，只係唔知道點參與。有其他球會搵我，但錢唔多，嗰陣得返8隊波，成個聯賽好核突囉。我都係想踢有競爭性嘅足球，如果做唔到，Why not 唞吓？」

後來，陳肇鈞輾轉之下加盟晉峰，「重返」職業足球，在足球明星選舉中獲得「球員之星」的獎項，去季再轉投大埔。年初亞洲盃決賽周，陳肇鈞在三場分組賽均正選上陣。他在出發前更多的是緊張，能夠進入港隊名單已很感恩。

在對阿聯酋的首場分組賽，陳肇鈞為香港射入第1,000球，獲得「一千鈞」的美譽，去季頭頂腳踢，為大埔贏得聯賽亞軍，以大熱姿態成為香港足球先生。果然，路終於走了出來，只是過程不免來得像過山車。

贏獎給身邊人交代 擁值得驕傲一刻

陳肇鈞表示，贏得獎項能夠給予身邊人交代：「佢哋只係問緊你，其實你想得到啲咩呢？錢就一定唔多，你仲要讀過大學，點解要犧牲咁多嘢，尤其香港地，咁無保障地做一樣嘢，我宜家就話到俾佢哋聽。」

在贏得足球先生後，陳肇鈞想說的是，沒有甚麼特別風光，但至少擁有值得驕傲的一刻：「我唔可以話係華人代表，但係可以俾其他人參考，佢哋都做到。如果我都做到，其他更有天份嘅人都可以做到。」

在2018/19年球季，陳肇鈞替大埔贏得港超聯冠軍，同時獲選足球明星十一人，他當時以為已「封頂」：「都唔經唔覺種咗好多種子喺度，只係唔知收穫係邊一年。」今年獲獎後，陳肇鈞更多的是感到釋放：「因為一直揹住好多人嘅重量，自己唔知道。贏咗唔會話特別風光，而係可以放慢腳步，我反而覺得係好自然嘅事。」

效力南區與列文爆衝突 「香港球員應該更有地位」

在13年間踢過9支球隊，陳肇鈞不是一帆風順，曾遇過不少委屈的事。在效力冠忠南區期間，陳肇鈞與主教練列文意見分歧，他得出的結論是「香港球員應該更有地位」。

事緣列文質疑陳肇鈞的待遇較高，自然要更全面、付出更多。陳肇鈞認為自己交足貨，體能已推到極限，而且有數據證明，及後遭對方向管理層抹黑，他最後與球會解約：「幾個月前做隊友，仲有傾有講，估唔到一下間就反轉。」

陳肇鈞表示，球隊管理層只信列文的片面之詞，未有就事件降溫及調停：「工作上當然要一視同仁，但香港本地球員買少見少，外援你可以搵幾多個返嚟都得，仲踢得嘅香港球員唔係特別多，一個為球隊貢獻過、球隊都重視嘅球員，管理層應該出嚟調停下，我個故仔無人聽過，咁咪由得佢囉。」

揭與傑志交手份外想贏波原因

在2021/22年球季後，陳肇鈞未獲傑志開出新合約，最終更顧此失彼，錯過了其他球隊邀請：「佢最後一兩日先同我講，我無時間搵第隊波，你點解唔早啲同我講呢？」他認為這已是傑志一貫的作風：「當然，你咁大間公司有權揀要邊個，但都有責任顧及球員嚟緊嘅日子，呢個係最低限度嘅尊重。」

在訪問中，陳肇鈞表達了對傑志的不滿，質疑對方對外援推崇備至，卻嚴重忽略本地球員，「好多香港球員都同佢哋不和而走」：「佢哋口講係一個香港人嘅球會，但所謂嘅香港人球會，唔會為香港人。最後都係個句，華人球員值得更多尊重。」如是者，陳肇鈞每次與交手傑志都份外想贏波：「你同我寫低佢，傑志係華人球員墳場。」

Why always me？ 現只專注開心事

經歷過顛沛不安，陳肇鈞已成為不會輕言放棄的人，但在硬朗的背後，他付出了很多力氣，去對抗「不想放棄」：「喺香港做足球員唔係你諗到咁樣，啲人淨係喺電視度，睇到我哋幾好幾好，喺Media 出幾多張相，背後係好唔易捱。」

心高氣傲，對一般人來說是負面，對陳肇鈞來說，則肯定是正面。然而，Why always me？談到如何處理不好的情緒，陳肇鈞自言，年輕的時候會想「點解咁多呢啲嘢發生」、「係咪我問題」，在經過年月洗禮，已只專注開心的事情，明白並非所有事都在自己的控制範圍：「你何必咁介意呢，始終會遇到諗法唔一樣嘅人，所以我宜家就係唔處理。」

公眾人物分擔社會責任 贏足球先生父親感驕傲

在贏得香港足球先生，當然談不上名成利就，畢竟香港足球大環境沒有改變，但陳肇鈞的工作機會增加，他推出了T恤作慈善用途，並獲邀出席商場活動、電影首映禮，及參與903 AllStar 足球賽等，可說終於有了「明星足球員」的模樣。

談到推出T恤，陳肇鈞覺得，香港要有更多球員往該方向發展，因為足球員一直較少「走得更前」，公眾人物應分擔社會責任：「要有地位就要企出嚟做啲嘢，球圈咁多年嚟都無乜人做，呢個係好重要嘅嘗試。」

父親是前冠軍練馬師陳柏鴻，父子二人偶然會談時事與生活。家人都認為陳肇鈞是很有天份的足球員，多年來都沒有給予壓力，壓力反而是來自「少爺仔」自己。在贏得香港足球先生後，陳肇鈞獲得爸爸的祝賀，為其感到驕傲：「佢對於呢啲嘢感覺唔係太大，自己都係呀嘛。」說罷，陳肇鈞不禁大笑：「佢冠軍嚟㗎。」

訪問在大坑的一間咖啡店進行，有大坑街坊向陳肇鈞送上該區名物熊仔餅：「香港足球先生，請你食熊仔餅！打好啲波得㗎啦，傳授多啲徒弟！」

亞洲盃後選擇留港發展 感謝大埔領導層

從卡塔爾回港後，陳肇鈞獲得中超、中甲球會邀請到內地踢波，最終選擇留在大埔：「有諗過吓，但興趣唔係好大。都唔講有無糧出，返咗上去可能要重新適應。如果10年前嘅話，就應該唔會諗太多嘢，上咗去先。」

除了享受拋頭露面，陳肇鈞已全心全意為大埔再贏港超聯冠軍。他感謝大埔會長葉吳彬彬、領隊葉志雄專注推動體育發展，「佢哋係全心全意好撐一班後生仔」。他今季唯一目標是港超聯冠軍，「希望有啲嘢交代到俾老闆，同堅Sir 重遇後，有一番實際啲嘢俾大家睇到。」

與李志堅亦師亦友 陳肇鈞：佢係天生的領袖

去年重返大埔，已是陳肇鈞第四度與李志堅並肩作戰，陳肇鈞很欣賞對方一直給予機會年輕球員。在12歲踢港隊青年隊的那年，陳肇鈞認識了李志堅，至今仍很珍惜與對方的關係。陳肇鈞指李志堅是他的最好朋友，20年來亦師亦友，更是足球生涯啟蒙老師。不過，當年的「堅家軍」今日已各散東西，大埔只餘下陳肇鈞及李家豪。

陳肇鈞表示，李志堅是其多年來唯一不是紅褲子出身，從未踢過職業足球的主教練。他笑言，李志堅當年的足球智慧不太高，但慢慢發現對方是天生的領袖，而且能夠將球員推至極限：「佢為足球犧牲咗好多嘢，無論家庭、事情，佢真係好鍾意足球。」

在不獲傑志續約後的半年，陳肇鈞的人生沒有方向，李志堅亦離開了東方：「佢叫我等多陣，等佢有一日可以返出嚟。」兩師徒去年在大埔重遇，陳肇鈞認為，李志堅雖然失落最佳教練獎，「對我嚟講佢係最佳教練」。

不做足球教練 因了解自己

打工仔在辛勤過後，最期待周末，球員最期待的則是周一，因為周末比賽後，獲得可貴的假期。陳肇鈞一直沒有考教練牌，日後亦不會做足球教練，因為教練工作很辛苦，所以尤其尊重華人教練：「今日可以有飯開，聽日可以無飯開，有無疫情都可以摧毀你。」

陳肇鈞解釋，由於很了解自己，一來沒有太多耐性，再者已深諳港超聯的圈子不會有太多「進化」：「我好欣賞霍生呢幾年做咗好多嘢，香港始終係香港，呢一兩年可能有啲進步，但唔會跳出到呢個框架。」

假如退役 想過「正常人」生活

談到一旦退役後的生活，陳肇鈞有這樣的想法：「如果有一樣嘢催谷我退休，嗯，應該會係想過返『正常人』生活。唔洗食止痛藥過日子，可以抽時間同屋企人去旅行。」

運動員的壽命有限，本地足球員生涯近年或許長一點，總得規劃前路。陳肇鈞表示「我仲係好踢得」，不論體能、技術仍能應付，而現時的年輕球員未能淘汰自己。他點名欣賞已37歲、東方的中場馬高斯，並稱讚隊友盧卡斯：「盧卡斯35、36歲都仲可以得，點解咁樣呢，下面嗰班唔夠好，定我哋keep得好？我唔知道，我淨係知道我仲有幾年嘅壽命喺度，我唔會嘥咗佢。」

建議年輕人入行？ 陳肇鈞：要視乎追求的目標

在訪問中，陳肇鈞強調對香港足球不是悲觀，只是不樂觀，年輕人入行與否就要視乎追求的目標。他直言，如果是家中經濟支柱「就諗都唔好諗」、「係無得諗」，因為香港是面對現實的地方，總要向經濟低頭：「你揸Uber 都穩定過你踢波。」

總結2024年，除了是豐收、難忘的一年，陳肇鈞認為更是第二個開始：「一定唔係終結，只係第二個開始，要好好安排嚟緊呢幾年足球生涯，幫大埔再進步啲。」

版權: 禁止衍生