劇透影評《填詞L》　有笑有淚的寫實追夢小品

《填詞L》喺上映後口碑唔錯，入場前本來以為係一個熱血故事，點知驚喜地係一套有滿滿共鳴、有笑有淚既寫實追夢小品。

最近場次陸續減少，希望大家可以趁早支持依部誠意之作！
(以下有劇透)

「得不得到掌聲還是盡興曾真心喜愛不遺餘力」

《填詞L》劇情簡單平淡，講一個年青人追填詞夢既故事，無加入任何戲劇性情節。雖然感受到主角滿腔熱誠，但電影一點也不熱血，因為佢同每個人一樣，追夢時會遇上無數挫折，不斷感到氣餒無力，付出與收獲永遠不成正比。

能做自己喜歡既事，甚至變成職業顧然快樂，但過程中往往變得太不顧一切，錯過生活其他美好事情，甚至令身邊人難受，依個或者就係青春既代價，寫實得心酸。

「誰叫我太執拗或好勝最後沉迷到錯過風景」

我特別喜歡HK Free Rider個段，一個已經有一定成就，能力同抱負兼備既老闆，當面對殘酷既現實時同樣會無能為力。特別身處依個城市，追夢實在太困難，最後梁仲恆暗暗流下男兒淚一幕令人唏噓。

「難得我耗光一世努力才放棄曾花過力氣不過未令人銘記」

然而，依套戲殘酷中又帶到點希望，其實夢想可能已經喺意想不到既時候實現，結合導演自身經歷，奮力追求夢想好似都唔係咁差。

電影最終亦無比一個明確答案，就係睇你想過點樣既人生。實現夢想總要面對重重難關，並唔容易，更唔擔保成功，但有夢其實相當難得，過程亦往往有意想不到既收獲，令你畢生難忘，做人活得無悔就好。

「白費幾多感情白費幾多志氣就怪當初你我太入戲」

主角塑造立體，由充滿抱負既年青人，慢慢被現實打沉，不斷失望依然不放棄，到最後心灰意冷，讓觀眾一同經歷整個追夢歷程與心態轉變。導演仲完全無美花自己，將稍為自私同鑽牛角尖一面展現喺銀幕上。

鍾雪瑩做得非常出色，由外型、對白到有點令人討厭既性格，貼地真實，難怪可以得到金馬金像影后提名。

「迷信我有天賦被看見努力成就我最暖一天」

身為半個創作者，喺電影中彷彿見到自己既影子。平時睇戲睇演唱會時，總會不自覺地諗之後篇文想寫咩，平時不論返工放假，都會突然有唔同idea浮出。

雖然我好開心可以將興趣發展成依個無錢賺既「副業」，但難免會融入生活，令自己無法完全享受，亦用上唔少私人時間。不過，當中既滿足感同由心而發既快樂，係日常生活中難以得到的，相信依個就係創作者們依然堅持既原因。

「曾經有你的執拗故事才有我成功太熱血小挫敗沒人說破」

無可否認，依部電影尚有唔少瑕疵，好似劇情比較零碎，幾條線都無疾而終。其他角色亦著墨太少，每次出場只係匆匆而過，結尾仲有點太突然。加上對填詞無咩認識或者興趣既觀眾未必有共鳴，令《填詞L》注定唔會成為一套人人喜歡既熱門作品。

「集結幾多支持任你怎麼禁播夢裡當天我有快樂過」

縱使《填詞L》未必啱所有人口味，不過我相當喜歡，亦非常珍貴。感謝導演將自己既故事紀錄，為追尋中，或者曾經追尋過夢想既每一位拍出咁有溫度既故事。

最後，自資出港產片依件事其實好熱血，再次希望大家多多支持！

娛樂