《久別重逢》口碑載道　一部出色嘅純愛電影

《久別重逢》上映後口碑載道，我睇完都非常喜歡，絕對係一部出色嘅純愛電影，值得更多！
（以下有劇透）

「要是聲線亦耗損 就以五指奏下去 指尖一旦亦擦穿就以記憶唱下去」

故事簡單淡然，節奏比較緩慢，拍攝感覺相當日式，經常有一片大海嘅畫面，平和中帶出點浪漫與憂愁，讓觀眾完全沉醉其中，睇得舒服自在。

久別重逢依個概念貫穿全戲，雖然加入時空穿梭元素，但唔會搞得太複雜，推進到角色成長同關係之外，亦為電影加添一份新鮮感。

「思緒仿似行雲 讓感受像流水唱 如能繼續唱 都必須唱下去」

蘇昇華自身嘅相遇對我嚟講最為感動，重遇滿腔熱情，有遠大夢想嘅自己，同長大嘅佢相映成趣，佢地一同創作簡直係神來之華。隨年歲增長，經歷過世界嘅殘酷與艱難後，往往會將初心遺忘，相信大家都有同感。

仲有好幾幕我睇到眼泛淚光，特別係兩位主角唱《我的歌》同主題曲《久別重逢》個陣，以歌聲完美演繹心境，一字一句都打進我內心，為電影情感昇華不少。

「那些暑天 無愁無憂 從何日盪遠去 染滿是污垢」

而電影另外一個重點當然係男女主角嘅關係。彼此以音樂結緣，日夜相處擦出青春火花，可惜情愫剛萌芽就要分別，依段青澀遺憾嘅情相當清新動人，無需親密接觸已經甜到漏。

到夏文萱穿越未來，仍然喜歡眼前依個蘇昇華大叔，真正做到當你愛嘅人唔好個陣，依然守護在旁，愛係可以超越時空。結局兩位望住年輕嘅自己一齊個幕更係錦上添花。

「並沒有錯縱有錯失太多 亦沒有錯奏過這一闋歌」

最後，電影選角實在太合適。伊健今次拋開型格瀟灑，做一個潦倒落泊，滿臉頹廢，對人生近乎絕望嘅中佬，再一步步被夏文萱改變，重拾年輕嘅熱誠。絕對係伊健近年最大突破嘅嘗試，我對佢嘅喜愛再次提升！

Ian角色亦係度身訂造，性格內向純真，音樂才華洋溢，一拎起結他就盡顯魅力，同佢本人非常相似。首次喺電影擔正表現令人眼前一亮，希望未來有多啲機會。

許恩怡更加係MVP，分飾「兩角」同樣自然，感情戲揮灑自如，天真陽光嘅個性相當討喜，不自覺就會比佢吸引到，前途無可限量。

「曲譜已既定 而不探問為何 彈出新一種 快樂難過」

總括而言，《久別重逢》係一部各方面都做得好好嘅作品，喺年尾睇異常溫暖窩心。可惜成績暫時只係普普通通，希望多啲觀眾會入場！

「你會聽到 這是我」

你又有無一個想久別重逢嘅人？

▼Follow hkpopculturelover
Instagram: https://www.instagram.com/hkpopculturelover/