盧頌恩揭《臥底》11年最伏行程　懶理被嘲發福：我天生下把

𡃁模出身的盧頌恩（妹頭）近年夥拍李尚正（阿正）主持《臥底旅行團》大受歡迎，不止節目成為HOY TV王牌節目，最新一輯《臥底旅行團5.0》更創下逾6點收視紀錄，變身「有線一姐」的妹頭近日接受電台節目《星光背後》專訪，除了憶述七歲喪父、不理母親反對入行的經過外；更披露服務有線近15年，從沒計劃過檔、樂於當節目下把的因由；另外，妹頭近年逐漸變胖亦成節目焦點之一，她坦承與數年前創業投資足浴店壓力大有關，她說：「無得釋懷，只能夠適應，無乜所謂，因為身形多咗人談論都係一件好事！」

李尚正經常於節目揶揄盧頌恩當模特兒時期的歌曲《下午茶》，當年妹頭弗爆清純的MV至今仍不時被網民回帶，妹頭在電台節目中不諱言讀中學時已有夢想考演藝學院入行，惟母親反對令她轉讀理工，不過唸大學期間遇上當龍友模特兒的機會，輾轉又讓她走進娛樂圈，她坦言：「我唔算𡃁模，𡃁模再索啲，嗰陣覺得好玩又賺錢又可以分擔媽咪負擔，當時好興『影會』，佢哋啲相機都好Pro喎，又打晒燈，係好多人一齊影一個女仔。我擺唔到性感甫士，都係扮可愛。」不過，這些龍友相卻令妹頭被Jam Cast公司看中，再羅致成旗下模特兒，之後安排她參與商台與TVB合作的《十人巷》，繼而讓她走上主持之路，分別於亞視講馬及有線主持足球節目，她更自爆首兩、三年入行做Freelance主持收入極可觀：「最高峰試過月入六位，細個覺得好OK，但真係忙到無得休息，廿四小時不停Loop，我都唔明點解自己嗰幾年可以捱到同咁勤力。」

被封為有線一姐，妹頭指她拍完《臥底》第二輯才正式簽約有線：「當時又講波又要講馬又拍其他嘢，就檔期就得好緊要好攰，就想揀定一個方向發展，有線嘅伯樂亦對我好好，就決定專注做綜藝。」《臥底旅行團2.0》2019年轉到免費頻道HOY TV播出後，阿正妹頭人氣逐漸飊升，性格知足及樂觀的妹頭坦言從沒想過跳槽：「一嚟無人邀請（過檔），自己亦無諗過，我覺得其他電視台唔缺我呢啲人，唔同台有唔同Style，大台要樣靚身材好，而我喺呢間電視台做得好舒服，亦好有感情，公司亦越來越有進步，無乜動機要走。」至於節目中經常要做阿正下把，看似被欺凌，妹頭表示：「阿正窒我就梗嘅，嬲唔落佢，佢咁得意搞笑，可能我內心強大，唔覺Bully我。佢笑人好高境界，唔會令人嬲，佢話我肥，咁我真係肥阿！我天生下把，我無問題。」

妹頭在節目中被問到拍攝《臥底旅行團》11年以來最辛苦的經歷，她即時想到曾由深圳坐巴士經廣西到越南的體驗，坐足十三、四個鐘巴士到邊境，過夜後再坐幾個鐘才入境越南，又坐多幾個鐘才進入旅遊區，令她相當難忘，至於危險旅行經歷，妹頭則憶述近日的杜拜團，在當地坐遊覽船被遊說買紀念照，拒絕後對方全程黑面，更被兩隻可怕吉祥物攻擊。

相比2014年首輯節目，妹頭近數輯的《臥底旅行團》身形變化甚大亦備受談論，她指是因為疫情期間創業投資於足浴店承受壓力所致：「真係由創業一刻開始，真係壓力大，瞓覺前一刻都諗鋪頭濕碎嘢，譬如好細微嘅裝修改動、揀邊隻廁紙都不停諗，無得釋懷，只能夠適應，無乜所謂，因為身形多咗人談論都係一件好事，公司又完全唔理，好正喎！」

不少觀眾認定阿正妹頭是一對，其實妹頭一早有個拍拖超過十年的圈外男友，但她坦言已過了恨嫁的階段：「細個會諗結婚為生BB，但而家覺得唔生BB都OK，媽咪都過咗擔心同畀壓力嘅階段，因為感恩家姐已經結咗婚同生咗。我哋一齊咁多年，結唔結婚都無乜所謂，最緊要舒服同開心。」