結業潮｜從主打旅遊到連繫社區　記 Lonely Paisley畢業禮　店主：養住個植物人唔易，拔喉又唔捨得

踏入2025年中，繼續多間戲院、食肆、商店紛紛結業，其中包括了 2021 年開業、定位旅遊餐廳的「Lonely Paisley」。 昨（1日）是餐廳的「畢業禮」，牆上的充滿異國風情的燈飾還掛著，餐廳老板林輝和 Sonya 邀請了一眾好友在店內相聚。店舖虧損六位數字，Sonya 說 24年底，便深知結業是必然的結局，「呢幾年每一次逆境波我哋都好努力打，養住一個植物人係唔容易，今日我哋幫佢拔喉個下係一個解脫。」

生於疫情時期的餐廳　主打旅遊吸引封關難離港食客
「Lonely Paisley」生於疫情時期，由一對熱愛旅遊的情侶——林輝和 Sonya 共同主理。縱然對行業內的不少餐廳而言，當年的限聚令、禁晚市堂食均是沉重打擊。但有危必有機，「Lonely Paisley」在逆境中，以異國風情的風格，吸引到許多喜愛遊行卻又無法離港的食客。當時，餐廳開業一個月許，他們便成功「維皮」。

損蝕至六位數字　林輝：個靈魂都可以繼續
至 2023 年初中港通關，餐廳生意每況越下。林輝苦笑道，每逢月頭出糧時，總會考慮結業的可能性，「真係冇錢出糧⋯⋯」。至去年年尾，餐廳損蝕至六位數字，加上同年九月又開了咖啡店「渴渴」。在精神和財力分身不暇之下，兩人無奈結束剛年滿四歲的大仔——「Lonely Paisley」。

林輝理性地說，「Lonely Paisley」的離場，教曉了他「分手要早」，「冇乜話好唔開心，好彩半年前開咗一間嘅咖啡店，呢度（Lonely Paisley）好似一個肉身嘅死亡，但個靈魂都係嗰邊（渴喝）可以繼續進行。」；同為 MBTI 是 T 人 ( 思考型）的Sonya也說自己沒有遺憾，「 呢幾年每一次逆境波我哋都好努力打，但打得多都係會攰⋯⋯」

Sonya：幫佢拔喉個吓係一個解脫
她形容，「呢度好似一個植物人，養住一個植物人係唔容易，好燒錢。但幫佢拔喉又唔捨得，你知道佢唔會好得返。今日我哋幫佢拔喉個下係一個解脫。」她嘴裏說得輕描淡寫，但眼眶早已被淚花沾濕。

離散是近年香港的常態。Sonya回憶道，「Lonely Paisley」剛營業時，因疫情、社運「少咗好多可以撞到好多同路人嘅機會、場景」，這裏卻見證了許多離別與相聚的時刻， 如上周五其中一名 47 人案刑滿獲釋的被告岑子杰也剛好「趕上尾班車」，在最後一天營業日一嚐「Lonely Paisley」的菜式。

Sonya淡淡言：「 呢幾年我哋由唔習慣離別到開始習慣，明白咗離散係呢個時代要經歷嘅嘢，由以前會覺得係一種 suffering 到覺得係生活嘅一部分，我地開始搵到 cope with 嘅方法。」

「香港仲係一個可以發夢嘅地方」
Sonya說，這四年來自己由一個「唔點熟悉香港嘅人」到發現「原來仲有好多人好有趣，好想為香港做啲嘢，透過呢個地方可以吸引啲人嚟。」這些年，餐廳舉辦了無數個活動，用他們的方法來連繫人，如：開業至今的手寫咭、社區跑步隊、出書《屋宇平民誌》 講述大坑西邨、邀請難民來餐廳煮飯，做成旅人地攤等等。

「香港仲係一個可以發夢嘅地方，但如果你唔撐，呢啲嘢就會慢慢消失。」她語氣轉急，像在與時間賽跑，「對一間舖嘅遺言，就係珍惜你身邊仲有嘅嘢，活在當下吧 。」

這一晚是「Lonely Paisley」的畢業禮，林輝和 Sonya 邀請了許多朋友來到餐廳，幾十人聚首一堂。他們開著平日珍而重之的酒水、播起音樂、在微暗的燈光下，肆意地享受相聚的時光。待今天（2日）一早，正式搬出。

歡迎追蹤以下平台，即時接收《集誌社》最新資訊，及付費訂閱支持！
【付費訂閱《集誌社》】
https://thecollectivehk.com/subscribe/
【訂閱《集誌社》Youtube】
https://www.youtube.com/@thecollectivehk
【Like 《集誌社》IG】
https://www.instagram.com/the_collectivehk/