海俊傑交代急籌70萬細節　感激古天樂、曾志偉幫忙

海俊傑日前（11月8日）聲淚俱下於社交平台發片，透露其化妝師太太莫家慈緊急需要換肝。片中海俊傑表示其太太早前留醫香港瑪麗醫院治療20日，後轉介到廣州中山大學附屬第一醫院，急需籌錢70萭元換肝，聲淚俱下求網友幫忙︰「希望大家幫到幾多得幾多，好多謝大家。」今日（11月11日）凌晨，海俊傑在社交平台再發長文，交代太太的最新情況，以及急籌70萬的細節。最後他特別感激古天樂和曾志偉等好友幫忙。

海俊傑發文交代太太由香港轉到廣州醫院的經過：「各位我係藝人海俊傑，首先好感謝大家對我同家人嘅關心，我太太因為身體狀況，早前被緊急送入瑪麗醫院，被確診為急性肝衰竭，經過同醫生嘅了解，佢個情況並唔樂觀……而我們一家一直住在內地，同屋企人商量後決定轉到廣州中山大學醫院附屬第一院醫治。廣州院方亦以專業嘅方法處理及各方檢查治療，由於太太嘅情況比較嚴重，就响佢留院入住後大概五天左右，病況出現好多未能預料嘅變化，需要轉到ICU作出緊急治療。」

海俊傑表示，估計手術費至少需要過百萬，但他們一家的原有儲備已「耗損」：「由於可能有機會配對，我亦都需要了解手術建議及醫療費用。醫院嘅收費透明度高，醫生認為太太的病情嚴重，醫院方面估算手術費50萬，但除手術費外其實亦都會繼續衍生不同嘅醫療項目費用，經初部計算前後至少要過佰萬。由於我哋一家原有儲備已在耗損情況下，難以承擔持續增生嘅醫療費用，所以响心情好徬徨不安嘅情況下，好抱歉拍咗條片令到大家擔心。」

海俊傑特別感激古天樂和曾志偉等好友幫忙：「片段出街之後有好大嘅迴響，收到好多人嘅支持同關心。特別感激公司 天盟娛樂培哥，演藝人協會，會長古天樂先生，曾志偉先生，以及好多圈內外好友的幫忙，感激不盡。太太嘅狀況每日需要同醫護團隊緊密去協調同部署，所以呢段時間確實需要同屋企人守候及陪伴太太，恕我未能逐一回覆大家，希望見諒。以上係到目前為止嘅大概狀況，相信可以釐清一啲誤解。响度再次感謝各位對呢件事嘅關注，多謝幫助過我哋嘅人，希望大家可以繼續為我太太禱告，所有人都要身體健康。」

海俊傑在1994年參加TVB新秀歌唱大賽奪冠入行，曾參演TVB不少作品如《總有出頭天》、《法證先鋒IV》、《逆天奇案》、《十月初五的月光》、《法言人》、《逆天奇案2》等。海俊傑於2012年在北京工作期間，認識任職化妝師的莫家慈，二人於2017年在澳洲墨爾本舉行婚禮，9月返港補辦婚宴。