馬拉松與人：Mandi 香港馬拉松

個個都話渣馬路線難度數一數二，上次港珠澳半馬當小試牛刀，今次先係真正打大佬！

但自11月跑完個港珠澳隻初半馬之後，又旅行又聖誕前夕好忙又突然發生太多事💔，太大打擊瞓得唔好成個人狀態都好差，跑量大減。然後1月頭有次跑完跑步機後，啲身體問題跑哂出嚟，左腳腳背同右盤骨刺痛，睇完物理治療好咗啲但一跑番又痛，之後更加唔敢跑得多，直頭冇練過長課，比賽前1星期已經完全冇跑，希望復原得幾多就幾多。

本身受傷前想聽教練 @runningkfc 話試下挑戰1hr50，但準備不足搞到個人慌慌哋，加上到前一日都仲未知隻腳好番哂未，根據上次港珠澳成績1:56:30，最後set咗3個目標俾自己：低標1:55、中標1:53、高標1:50（起跑前幾乎放棄），諗住達到低標已經開心！

比賽前一晚10點幾就上床瞓，但平時做開夜猫，時間太早兼好肚餓完全瞓唔着，半夜起身食包餅乾再眼光光到2:30am先瞓到陣，4am幾起身時覺得同冇瞓過冇分別🤡。

好彩天氣啱啱好，小涼但一啲都唔凍又唔曬，頭4K開快咗都感覺良好，但估唔到4K左右開始就小腌抽住痛，中間有幾下幾乎想抽哂出嚟，唯有一路按住個肚嚟跑，之後左腳開始嚟料，但我同自己講放鬆啲，反正唔追1:50高標，跑到就跑，所以 @mictsui 喺前面帶跑我都係盡跟冇死跟，知道你仲成日放慢等我🫣。

不過跑到出西隧又上斜又落斜，每逢斜路左腳就愈嚟愈痛同想抽筋，每一下都要就住落地，feel到自己已經跑到歪歪哋，係未痛到跑唔郁前生吞咗粒止痛藥，諗住起碼捱到番終點先，加上最尾段係平路，隻腳好似又好小小。

最後1K大家開始係咁加速，沿路超多途人打氣，氣氛好好！聽到有人講「師姐好型呀加油」！「嘩no.1234好靚喎加油」！仲有 @yiu.nicole@momoleungmomo @ookklam @gwoo @monica.wongmy 同已經跑完全馬係終點前等緊既 @wkk_tr1 ❤️，每一句加油都令我好似真係加咗油咁有力跑快2步，睇番錶原來尾段我係用4:36 pacing衝線！雖然跑到痛苦面具，但真係覺得好開心好熱血，開始愈來愈明點解咁多人對跑步又愛又恨🫵🏻！

最後個人時間1:51:16完成，PB咗5分鐘，好驚喜好振奮！

多謝教練 @runningkfc@crazyrunningclub ，9月份先開始上跑班，認真有規律地練跑。原來跑步都有好大學問，每上1堂都覺得自己有進步有得着❤️‍🔥；多謝爸爸 @mictsui 全程帶跑，如果我自己跑好大機會係頭幾K小腌痛果陣已經減速，根本冇可能keep到5:1x pacing🫡。

最後多謝萬金黃總 @wkk_tr1 鼓勵萬金獎金💰，拎住啲獎金養下傷先，跑完腳背又紅又腫🫠，出年我會乖乖哋繼續玩半馬申請黃總獎金（暫時唔會考慮全馬），希望下次狀態好啲可以挑戰到sub1:50🫡。

Please follow Insports Hub on Facebook & Instagram
https://insports-hub.com/
FB
https://www.facebook.com/insportshub
IG
https://www.instagram.com/insportshub/