馮德倫搵陳奕迅教唱歌　短片掀《老馮日記》回憶殺

馮德倫（Stephen）早前推出新歌《屢戰屢敗又怎樣》，並請來著名攝影師夏永康（Wing Shya）操刀執導新歌MV。Stephen近日在網上上載一條搞笑短片，老友陳奕迅（Eason）驚喜現身，短片創作如Stephen《老馮日記》的處境劇拍攝手法，以幽默搞鬼的方式呈現，掀起不少網民有關《老馮日記》的回憶殺。

短片講述 Eason正專注投入地試唱他的新歌，老馮想出詭計在旁偷偷錄音，希望將Eason的靚聲跟自己的歌曲混合，二人搞笑對手與精彩的演出，連太太舒淇也加入留言力撐：「老馮日記2幾時拍呢？」Stephen回應：「等緊你檔期。」圈中好友徐濠縈、張繼聰、周柏豪等也紛紛留言以示支持，舊拍檔雷頌德也留下笑笑emoji，Stephen見狀即趁機追交歌︰「唔好齋笑，快啲寫歌。」

不少網民力推再拍《老馮日記》，Stephen再在threads透露已構思多年但未實行的原因：「其實好感激大家對老馮日記嘅厚愛，再拍我真係諗咗好多年，橋都諗咗好多。唯一未諗到就係應該用乜渠道發。都知道當下嘅年輕人可能已經冇耐性睇咁長嘅一集。用短視頻係可以work嘅，但係又點樣營利呢？真係請教吓大家。認真問題（但係我啲回覆未必認真）。」

今次Stephen推新歌可謂出盡人情牌，提到找Eason拍片的原因，Stephen笑說：「呢個構思係好突發嘅，係有《老馮日記》嘅感覺，其實有一晚我約咗Eason去我屋企食飯，我就話畀佢聽有呢隻歌，佢就口噏噏喺度唱，我心諗唱得咁好聽嘅！個靈感係嚟自呢度，咁偷錄嗰啲就係加落去玩嘅，令成件事幽默啲，我好感謝佢肯陪我玩，非常感激佢。」